練演講

學生為著校外全國性个演講比賽塊練習。台語系第三屆个新生，紲接第二屆个法度，有招卜一半个甄試生 [tsin-tshì-sing]，內底有真儕自細漢著不時出去佮儂比才藝个囡仔，聲音響[hiáng]，膽頭在，喙講手比好笑神。

知影姻即禮拜塊做最後个訓練，我又閣好 hiân，走去做家婆，坐佇邊仔罔聽看姻按怎講，共熱心過來指導阮个淑真老師鬥掠包。口語表演个藝術我是大外行，總是，若干那卜聽看啥麼字文音白音 hut 毋著、本調變調花--去、輕聲亂--去、入聲無入聲，抑是收毋著所在、陰陽去聲 gōo-tānn=个、g 聲母 lak 去=个，這是我个本房[pún-pâng]。拄著[tú-tio̍h]--a，嘛會鬥換一寡用詞，著準有袂少華語詞，只要學生字音唸會準，嘛予姻去發揮，無愛共改傷儕，時間亦無夠，嘛驚了改一下姻煞講甲 thi-thi thu̍h-thu̍h 彼著慘。時勢行到遮來矣毋，汝看台仔頂，叨一个台灣儂塊演講毋是按呢生？

學生隨个仔隨个，攏有伊个所長 [sóo-tiông]。有个準備了卡周至个，咱卜共鬥相共，順風好駛船。舊年得著全國第二名，即陣升起來做 siăn-pái 个陳同學，知影thang利用等待个時間，走去影印伊个演講稿，予阮遮个老師一儂一份。卜共鬥抾句讀[kù-tāu]，就卡好落手矣。

昨暗轉來，卜睏進前，本成卜照我最近對家治个要求，早暗攏著讀寡台語文獻，當做塊讀經。想著陳同學个講稿，共挓出來閣 sūn--過。姻即班个學生，予我教過一冬，定定聽我塊唸家治做个四句連，儂講豬母近戲館邊，袂吹簫嘛會扑拍 [phah-phik]，莫[bo̍h]講叫是親像遮个tshut-tioh个學生，所以姻嘛攏有想一寡押韻个話句囥入去講辭內底。總是，工夫毋是一冬半冬，字數無 tsê-tsánn、韻跤無鬥搭、意思無貫串[kuàn-tshuàn]，攏是袂免--得。我著激頭腦，照伊个原意，將伊做个兩葩四句連，tshiâu 予卡 sù-sī 咧。其中一葩是按呢：

鄉土文化卜生湠，地方學校共心肝，
傳統技藝牽紅線，開花結子滿四山。

hiong-thóo bûn-huà beh senn-thuànn, tē-hng ha̍k-hāu kāng sim-kuann,
thuân-thóng kī-gē khan âng-suànn, khui-hue kiat-tsí muá-sì-suann.

學生講伊用技藝，是為著卜強調「技」个成份，親像沙lak个九天戰鼓、草屯[tùn]个明珠歌仔團。毋閣伊毋知技藝按怎唸，我知影是 kī-gē，毋閣我嘛知影台灣社會「技」--字幾乎[ki--hōo]無儂唸去聲矣，攏是形倚音縒 [hîng#uá#im#tsua̍h] 讀做佮「枝」共音去矣。按呢卜按怎？毋知遐个評審先生程度怎樣、態度怎樣？明仔再我 iá 是 khà 電話叫伊愛唸「正音」第七聲好矣。

另外，第二句个「共心肝」，若卜講涵意卡深一點个，會使換做「地方學校相交盤 [kau-puânn]」，交盤是交際互動个意思。這毋知評審聽有無？是按怎講「相交盤」內涵會卡深，因為按呢四句相紲，攏總是延續「生湠」即个「物種繁殖 [huân-si̍t]」个意思落去做比並。毋閣，涵意深，無的確文學效果著卡好，文學真大面是背後个文化共業 kīng 出來个，目今已經 tsiah 罕用个交盤，卜按怎予讀者、聽眾生出文學tik 个深感受？

舉以上个例，來講我心肝內對改學生个講稿儕儕思慮个一部份。

若有讀者知影叨一 phō 冊是塊議論文學佮我頂面講个「文化共業」个關係，拜託報我讀，感恩。