翻譯僫

翻譯是一門大學問，亦著有一般性个理論（就是講就人類語言个通性來論），亦著針對個別語言个所見奇來講究。相關个文獻tha̍h起來卡峘山。

中文个四字成語不止特別，伊佮英文个 idiom 有增差，嘛毋是 proverb。卜深入分析伊个性質、功能佮佇言辭(discourse)中个地位，無用幾那萬字是無才調。

即馬已經足晏喇，我先簡單提出一个佮本網誌个大主題有關係个思考點：到底佇華語文章內底不時puh出來个四字成語，佇台語、台文內底按怎講、按怎寫？這至少有兩个層次：高層[ko-tsân]个翻譯策略[tshik-lio̍k]；閣佮具體的[tik]，每一个成語按怎翻譯个探討。

這會成[tsiânn]做問題个因端[in-tuann]，我都亦講過了，就是目今[ba̍k-kim]多數个台灣儂華語程度攏卡贏台語，姻腹肚內計計[kè-kè]積積歸堆用北仔話呼音个四字成語，雖是一開喙攏臭酸hiàn，姻 iáu閣足giàn食。卜叫姻講台語、寫台文，若無捧共款氣味个食食[tsia̍h-si̍t]出來 that姻个喙空[tshuì-khang]，姻 to袂過giàn。

我發現一个現象：台灣儂卜寫英文作文，卡罕得會去問老師講，華語个啥麼四字成語，英文按怎講；比較的[tik]，姻塊學寫台文，就卡tsia̍p會問起即種問題。

因為英中、中英對譯个資料足儕通參考，咱會使先參考中文四字成語按怎翻做英文个議論，紲落來才來想看華台對譯个問題。對按呢，相信讀者會得著一寡無共款个想法。

為著卜比較現時市面个電子辭典，我無意中看著一篇文，內容主要是傅一勤[pòo-it-khîn]教授个演講記錄，題頭是〈從《林語堂漢英詞典》到《新時代漢英詞典》—談中文四字成語的英譯〉。傅教授是編輯[phian-tship]英文辭典个權威，亦翻譯過袂少英文冊，毋閣，kan-na對即份記錄，我並無感受著伊有蓋深个翻譯理論个素養。總是，伊提出个意見，已經足額thang予咱有一个開始思考个出發點。

建議來遮捧場个讀者貴君，特別是台語系个學生，請會記得去讀傅教授迄份演講記錄，相信對汝有啟發[khé-huat]。

另工有閒，我會紲落去講我對華語四字成語卜翻做台語个想法。