講著「脫線」[thuat-suànn]，可比講「即个儂真脫線」，是咧形容伊無正經、歸日kik thian-thian。
1931年台日大辭典有「脫線」即个詞，但是彼是對日文吸收--來个台語外來詞，意思是火車「脫軌[thuat-khuí]」，台語口語講「火車跋馬[pua̍h-bé]/跋落馬[pua̍h-lo̍h-bé]/敗馬[pāi-bé]」。
若按呢，「脫線」个現代用法是按怎來个？咁是因為有一个台語片个老演員藝名叫做「脫線」，伊串演一寡無正經个角色，所以「脫線」煞變做一種對儂个形容詞？抑是因為「脫線」早著先變做即號意思，伊才刁工號即號藝名？我看，這愛來去請教陳炳楠[Tân Píng-lâm]先生（脫線本名）。
閣一个卡少年个老牌演員黃西田[N̂g Se-tiân]」（本名黃日平），卡早儂攏叫伊阿西[a-se]。「阿西」佇台語做形容詞，是講一个儂孝呆孝呆。這台日大辭典著有收「阿西」，意思佮現今个用法共款，語源毋知咁是咧恥笑西洋儂/西魯[Se-lóo](Russian)/西班牙儂？
阿西即馬卡有歲矣，雖然猶閣佇「鳥來伯與十三姨」內底演一个阿西阿西个戇孫李英雄，儂伊嘛有主持「草地狀元」即種文教節目，伊去採訪个對象，儂儂攏叫伊「田--哥[Tshân--ko]」。
台語片lo̍h-khénn了後，脫線改行種椰[iâ]、飼羊，攏了。尾手改飼雞[ke]，才起家[khí-ke]。921地動，伊專工送雞去災區賑濟[tsín-tsè]，了後西部个觀光客攏溢溢來台東伊个農場，愈興旺。
勸世歌[khuàn-sè-kua]唸講：儂个尾溜看毋見，圓--儂會扁 扁會圓。[Lâng ê bué-liu khuànn m̄-kìnn, înn--lâng ē pínn, pínn ē înn.]
Comments powered by Disqus.