腦內乾坤

《腦內乾坤：男女有別，其來有自》Ann Moir & David Jessel 著，洪蘭譯，台北遠流出版社，2000年中譯第一版，2006年中譯第二版。原作：Brain Sex: The Real difference between Men and Women, 1992.

即本冊是塊講，男女个差別，關重个因素毋是父母个期望、社會个制約，彼攏是加強个助緣niā-niā，根本性个原因是出佇先天个大腦神經系統个結構，男女本底就大大各[koh]樣，佇胚胎个早期就受著hoo-lú-bóng个影響來決定矣。扯勻[tshé-ûn]講起來，男性著是卡有攻擊性、權力慾、卡關心物質，女性著是卡溫和、卡無愛相爭、卡關心儂。男性卡有方向感、卡爻算數學、做抽象思考、卡有事業心；女性卡爻講話、感受力卡強、人際手腕卡好、卡顧家。男性大腦兩个半球連結性卡bái，功能性个分工卡清楚，負責某一个功能个部位受傷，迄種功能就會失常，女性个大腦是分散性个，某一部份傷著，別个部份會使彌補[mí-póo]傷著迄跡[jiah]个功能。男性个胼脂體[piân-tsi-thé]（連結大腦雙爿个神經束）卡幼，正爿半球个感情覺受卡無才調傳過來倒爿半球个語言區，所以查夫儂一般卡ham-bān表達感情。一句流行話講：「查夫是視覺个動物，查某是聽覺个動物」，這嘛是有生物基礎个。

若是母體內个囡仔栽，hoo-lú-bóng無正常分泌，抑是老母食著有hoo-lú-bóng个藥仔，就會生出「無正常」个囡仔，查夫个大腦予束縛佇查某个身軀內，抑是顛倒píng。同性戀嘛是先天性个。

毋是講，只要條件（親像教育、家庭、社會因素）共款，佇任何方面，查某儂一定會凍做甲親像查夫儂hiah好。平均來講，查夫有姻卡強个領域[líng-hi̍k」，查某有姻卡爻个所在。予姻隨儂隨性自由去發揮，才是真正个平等。刁工將男性女性个先天差異當做無存在，用一模一樣个教育方法佮內容來教育查某囡仔佮查夫囡仔，最後iá是得袂著共款个表現。「因材施教」个理想著愛考慮著男女大腦結構个差異。大腦佮hoo-lú-bóng个作用，會影響著男女个智力、知覺佮情緒。

即本冊最後一章有講：「設使汝毋肯接受性別差異个證據，就無可能去改變制度或是結構來配合遮个差異，所以，女性著愛家治去適應，因為hông要求佇查夫儂个制度內佮查夫競爭，最後的結果只是繼續予儂khau-pak，致使不滿佮慒心愈嚴重。」

除非是予媒體（尤其是電影）hōng起來个暢銷冊[thiòng-siau-tsheh]，若無，一本外文冊卜等到有中譯本，攏愛幾那年，從中，電腦冊个翻譯速度大概是上緊个。像即本冊个原作是1992年，內底參考个資料主要是1980年代抑是閣卡早以前个，到tann一二十年落來，恐驚已經閣有袂少新發現矣。

一方面，儂受伊先天生物性个控制，另外一方面，儂个可能性極大無比。所以修道儂會使修甲出現不可思議个生理變化佮感受能力，目前个科學並無才調去解說迄種現象。即本冊會使予咱啟發，但是咱毋通將目今科學个發現當做真理，就按呢來否定咱超越動物性个可能。