臺灣歹風俗 △歹嘴

題頭：臺灣歹風俗（其三）△歹嘴
作者：東方孝義
出處：《語苑》雜誌第12卷第6期，1919年6月。

東方孝義是日本時代非常重要，教日本警察官員講台語个教師。伊所編个《臺日新辭書》(1931) 真有價值。

伊佇即篇進階教材，先歸納講，遐个歹喙，大半較加，是講下身[ē-sin]个話，才閣列出台語歹喙話个關鍵字：動詞「姦 kàn」、名詞「玍（𡳞） lān」（男性器官）、「之（膣） tsi」（女性器官）、脚尻（尻川）[kha-tshng]（男女），予語苑个讀者（是大儂，毋是囡仔）清楚掌握。

片岡巖《台灣風俗誌》(1921) 有一節收集袂少即種粗喙話，頂日仔真濟儂好玄轉貼，因為只是語料收集，較無教育意義。

現代 Oxford 出版个英語語法課本，有一張表列出即類个英語粗魯話，閣有用幾粒星來分級歹聽个程度，是閣較幼路个教材。

台灣社會講粗喙，上歹聽个話，我分做兩大類：「性」佮「死」（「性」包含大小排泄功能）。查埔儂講歹喙，較愛用「性」个攻擊話，婦人儂無論大細漢，較愛用「死」來詈罵[lé-mē]，若是特別歹个查某儂就會學查埔儂 tshoh-kàn-kiāu。

除了「性」个攻擊話，西洋儂特別愛用「褻凟[siat-to̍k] 上帝」个話來罵，這台灣無，宗教文化無仝。