色美

〈太上感應篇〉內底有兩句話：「見他色美，起心私之 [kiàn thann sik bí, khí-sim su--tsi]。」一般是用白話解說做：看著查某生做嫷，著起私心想卜共伊佔有。

在佇我想，「他」無的確是查某，是任何對象。「色」，無定著是外貌，是內外所有个形影、聲音、氣味、觸感、性質。

「美」，是一切予儂感覺會「佮意」个成分。美，íng-íng 有「同感性」，亦就是汝看了佮意，別儂看了嘛佮意。儂儂佮意，儂儂想卜「私--之」。卡野蠻个，會用強摃[kiông-kòng]个；卡文明个，會用輸贏个。按怎輸贏？「看啥卡有資格」。

因為按呢，一个「文明个斯文儂」，著會開始活佇「我咁有資格得著伊」个煩惱 [huân-ló] 內底。

閣卡悽慘个，「有資格、無資格」，毋是家治會凍決定个，亦毋是家治一直拚命落去，就會變做有資格个。

按呢看起來，佇「見他色美」hit-tang-tsūn，著愛有一个卡妥當个態度，來發起咱个心念。若無，愈後壁會愈艱苦。

按呢足無簡單，毋閣，這有一項取，就是會凍完全看家治，毋免看別儂。