英文 "house" 个意思，台語叫做 tshù，引申意思是 "home"，民間自底就一律寫做「厝」。有一寡博學个台語漢字專家，一向真不滿民間即種用法，怹引經據典，指出「厝」是「安置」，而且往往是咧安置「棺材」，用佇「停柩」，哪會使得提來講一般活儂个house/home？
台語即个 tshù，佇明朝、清朝个泉州話南管文獻就攏寫做「厝」，所以毋是日本儂、抑是蔣--氏來佔台灣，毒心醜化[tshiú-huà]台語，才變按呢。
民間借漢字來記錄在地語言，往往無咧插[tshap]伊古文本義是按怎。橫直就是「看字唸音、聽音解義」，借音了後个意思佮本義差大碼，嘛無要緊。
請毋通嫌民間百姓毋捌字閣兼無衛生，死活無分。上古以來，漢字「六書」就有「假借 ká-tsià」即个條例，假借了後，一旦約定俗成，伊个意思、用法就佮本義切斷關係，這是經典通則，無啥奇怪。
像「也」上古本義是女性性器官，「且」本義是男性性器官，但是借來做文法虛詞了後，無儂 會無聊甲去聯想伊个本義，若無，一本論語，煞變「A書」！
毋是干焦古早聖人、皇帝才有資格假借漢字啦，漢字早就是全民个漢字，咱台語儂个祖先代代沿用，起碼超過五百年个漢字假借字，咱嘛著尊存[tshûn]。
進一步來論，漢字毋是中國帝王、士大夫个專利品，甚至也毋是全體中國儂个專利品。
漢字文化圈內底个逐國、逐族，長期使用漢字个人民攏有對漢字進行無仝解說佮應用个權利。
干焦根據中國官修韻書、士大夫韻書來稽考佮鑑定台語漢字，是e̍h-te̍h个學術心態。
（注：e̍h-te̍h, 狹隘[hia̍p-ài]个意思。）
「厝」至少對明朝開始，福建儂、台灣儂就按呢一路用到tann，咱應該看重先人个用字，珍惜咱特別个漢字詮釋[tshuan-sik]。先人攏用了好好，無議論，怎樣今仔日台文界先進會對即字遮爾不安、不滿？這到底是按怎來个心理？
相片是明朝嘉靖丙寅年(西元1556年) 所刊行个南管戲文《荔鏡記》，早就用「厝」字，來表示 "home"：
「東風微微 正是新春景致 憶著在厝 好酒慶賀新年」。
（「憶」唸白話音 it）
Comments powered by Disqus.