《英華口才集》

1898年馬約翰牧師編《英華口才集》（A Manual of the Amoy Colloquial, by Rev. John MacGowan），是廈門話个教材。伊有一點非常寶貴，就是會使予咱透過英、廈對照，來體會英語語法佮廈門話語法無仝个特色。

伊个廈門話，簡捷、媠氣，毋是照英文字面戇戇仔直譯。英文慣勢用 SVO（主詞+動詞+受詞），但是廈門話足愛用「主題提前」个表達法，受詞若是主題，就徙去句頭，而且主詞若佇語境中會凍了解，就省起來，免加講。

相對來論，巴克禮牧師廈門話聖經譯本（新約 1916，舊約 1933），對重忠實原文（希伯來文、希臘文），所以出現真濟語句、表達法攏無啥自然个話句。

照我看，欲了解當時个廈門話自然口語，英華口才集是較好个文獻。總是，巴牧師聖經猶原有無通取代个價值。

有心欲將英文、甚至中文作品翻做台文个友志，小弟大力推薦即部冊，真有啟發性！

下載連結《英華口才集》。愛有 google 口座才掠會落來。