本文
第一組
華語1：〔他答應說要來，到時卻沒來。〕
台語1：「他答應講欲來，時到煞無來。」
第二組
華語2：〔有人愛吃美國牛排，有人卻愛吃日本料理。〕
台語2：「有儂愛食美國牛排，有儂煞愛食日本料理。」
第三組：
華語3：〔有人愛吃美國牛排，卻也有人愛吃日本料理。〕
台語3：〔有儂愛食美國牛排，煞也有儂愛食日本料理。〕
中少年个台語儂（包括著獎个台語文作者），受著華語影響，以上三句台語攏有可能會講著。但是照阮即沿个語感，台語2 意思走爭，台語3 錯誤。
怹佇日常交談所培養出來个語言對應智識，知影華語〔卻〕有个話句，台語會使得用「煞[suah]」來表達，煞tsua̋n不知不覺來過度類推，掠叫是華語只要講〔卻〕，台語就會使講「煞」來對應、翻譯。可惜這無遐簡單。
台語語氣轉接副詞「煞」，通常是講話者欲表示對一項代誌、現象，感覺意外，心理上歹接受个時才會用，所以台語1 就是對失約者無來表示想袂曉，抑是袂接受。
教育部台語辭典「煞」即个詞條，有列出七个解說，包括有四个是動詞用法、一个是代名詞、一个#副詞、一个#名詞，其中个副詞用法，伊就是按呢解說：「竟然，表意外的意思。例：伊煞走去嫁翁。I suah tsáu khì kè-ang. (她竟然跑去嫁人。)」（教典例句有父權心態，這咱佇遮免批判。）
（2023-10-21補記：「伊煞走去嫁翁」即个例句，毋但意識型態有問題，而且也無頭無尾， 毋是一个ka-nn̂g个例句，是不良个示範。佳哉，教典後來有改做「氣象報告講會好天煞咧落雨。」 毋過，若我來寫，「好天」後壁我會加逗點。）
但是論到台語2、台語3 个情形，彼只是就某一个主題个兩種無仝情形提來做對比，講話者並無對後一種情形感覺意外、歹接受，這就無應該用「煞」。
若是按呢，較妥當个台語欲按怎講咧？若就阮即沿个語感（閣強調--一遍），就會用「毋過、毋kú、但是」來代替：
台語2-1：「有儂愛食美國牛排，毋過有儂愛食日本料理。」
台語3-1：「有儂愛食美國牛排，毋過也有儂愛食日本料理。」
兩句完全仝款，爭差一字「也」，口氣、意思小可仔出入，各位tsiah體會看覓。
咱若閣稽考較古早（日本時代、清國時代）个台語口語文獻，就會發現，其實當時个台語嘛有用著「卻[khiok]」做副詞，所以以上兩句會使講做：
台語2-2：「有儂愛食美國牛排，有儂卻[khiok]愛食日本料理。」
台語3-2：「有儂愛食美國牛排，卻[khiok]也有儂愛食日本料理。」
即種「卻」个用法，台日大辭典另外閣收一个白話音唸做 khioh。
台語即个「卻」，論真比華語〔卻〕閣較好用，因為用途閣愈闊。例句：
台語4：「牛排我卻是真愛食，總--是毋敢食濟，驚仔會大箍。」
台語5：「牛排我愛食卻是愛食，毋過無錢 通[thang]捷買。」
古早台語即種「卻是」个用法，若欲翻做華語，講〔倒是〕較倚意。
總--是，即種「卻 khiok/khioh」、「卻是 khiok-sī」，現代台語攏罕得聽著矣，無彩。台語4 佮 台語5 現代台語就直接講「我是真愛食，…」、「愛食是愛食，…」，無閣講「我卻是真愛食，…」 、「愛食卻是愛食，…」。
列位貴君看過頂面个說明了後，閣看「掰掰啾啾」所製作即段真心適个台語bàng-gah，就會智覺著伊有一句台詞 話意各樣[koh-iūnn]：
https://www.facebook.com/ByeByeChuChu/videos/vb.119576904728174/810834935602364/?type=2&theater
面冊網誌留言
Jūkhái Piãbér Lîm
汝有 發現ah ^ ^
潘科元
汝mā有智覺著ah ^^
Jūkhái Piãbér Lîm
某 學校台語文系…
Vito Chang
潘老師，這蓋好的解説，我進前佇掀「臺灣閩南語語法稿」內底無講著這。
請教一下，「走爭」敢是「走精」？「爭差」敢是「精差」？
潘科元
教典寫「走精、精差」，但是本字是「走爭、爭差」，參考拙文：
〈台語tsing-tsha本字是「爭差」毋是「精差」；tsáu-tsing本字是「走爭」毋是「走精、走鐘」〉
Vito Chang
煩惱啊！
我干焦讀教典彼本爾爾，毋知猶有原底（本字）的。
潘科元
毋免操煩遐濟，拄開始照教典用字就好。阮寫个佮教典大同小異。
Vito Chang
看電視的字幕，攏寫「走鐘」，我看甲干焦幌頭的份爾爾，也無彼號才調去叫電視台的人校正。
潘科元
補充：列位貴君看過頂面个說明了後，閣看即段真心適个台語bàng-gah，就會智覺著伊有一句台詞 話意各樣[koh-iūnn]：
https://www.facebook.com/ByeByeChuChu/videos/vb.119576904728174/810834935602364?type=2&theater
蔡坤福
阮攏講”牛排愛食是愛食”意思清楚擱足簡省!!
潘科元
著。我來補一下。多謝。
Nina Iûnn
連接前後句的用詞習慣佇逐種語言差別誠大，有時呣是三言兩語佗講會清。
http://www.facebook.com/toklip/posts/773810985970763
潘科元
nā-sī 有時表示「若是」、有時表示「但是」，愛看頂下句判斷。「但」有 nā 个白話音，「nā-sái 但使」是「只要」个意思；句尾詞 nā-tiānn，應該就是「但定」。
Tsì-sîng Tionn
台語3-2：「有儂愛食美國牛排，卻[khiok]也有儂愛食日本料理。」敢會使按呢講：「有儂愛食美國牛排，嘛有儂愛食日本料理。」感覺講後壁句的機會較濟。
Andy Chen
在我看「華語2」「華語3」是錯誤ê句型，kám講台灣人會講ánni…? 上少我boe7…
潘科元
華語嘛真濟變體，我討論个華語，若無特別註明，攏是台灣華語。
Comments powered by Disqus.