華語﹝打水漂兒﹞是阮讀國中，佇國文課本學著个。但是即種活動，阮國小去溪邊泅水，常在咧耍，可惜從來毋捌聽過囡仔伴抑是序大儂提起台語个講法，嘛毋知主動去問。可見台語文進入學校體制來進行系統化、有意識个學習，絕對有必要，若無，的確會愈來愈死失。
我研究台語了後，才知影〔打水漂兒〕台語叫做「考水披 khó-tsuí-phi」，「考 khó」是動詞（寫「考」可能是借音字），意思是「相[siòng]予精（瞄準）才發射」，親像瞄準開銃，就叫做「考銃 khó-tshìng」。吳樂天講古，紅龜--个撏[jîm]短銃出來威脅對方講：「這考--luè 會死哦！」。
「考水披」嘛有講「tshian水披」（tshian 佮「千萬小心」个「千」仝音），tshian 一般是做形容詞，「拄好、準準」个意思，像講「射箭真tshian」就是射了足準；「tshian-tú-tshian，予伊看著」就是華語〔好死不死，被他看到﹞。tshian 佇遮是用做動詞，嘛是相予精个意思。
「考水披」嘛有講「披水披」。「披」本義是將物件展[thián]開、將表面用予平（像「披衫」），講「披水披」是比喻欲用石杮[tsio̍h-phuè]（石片）將水面披予伊平。
俗語「用銀 考水披」，是浪費金錢个意思。親像馬政府干焦會曉提咱納个稅金咧考水披，但是我想著怹做一齣漚戲愛開兩億，感覺「用銀披水披」根本無夠額形容，應該發明一句新俗語講：「將庫銀當做庫錢咧燒」。「庫銀」是國庫个錢銀；「庫錢」是燒予往生者个銀紙。
另外，有一種細隻个平底船叫做「水披仔」，嘛有一種細隻水鴨叫做「水披仔」。這佮「考水披」有共同點，大概是台語儂祖先觀察著遮个物件攏佇水面「披掠而過[phi-lio̍k jî kò]」（用文言方便解說），才攏按呢號名。
杜建坊先生來賜教：
「披水披」？「批水批」？
「披(衫)」漳、泉仝音phi。但是「○水○」，泉、廈音phi-tsui2-phi；
漳音phe-tsui2-phe；「披(衫)」漳腔無可能讀phe。若照漳泉个音義理路「○水○」漢字寫做「披」恰袂通。
因為「○水○」个動作是抾一粒扁扁个石頭餅，出力按「水皮」khau過，石頭跳愈濟phi/phe，愈爻(gau5)。只款个動作是親像phue肉皮抑是魚个sasimih(さしみ刺身)共款，平平仔、薄薄仔lio5一ian5。
《閩南話漳腔辭典》寫做「考水批kho2-tsui2-phe(P365)」；「批」泉音phue(白)/phi (文)；「批」字，原本就有khau、削个意思，音可能有恰勉強，意思會通。若卜寫漢字，只字會使考慮。
潘科元回覆：
多謝建坊兄賜教。既然漳腔講 phe-tsuí-phe 按呢寫「披」毋著。
但是寫「批」，扑算對泉、廈腔來講，是卡勉強。既然口語講 phue物件，按呢〔打水漂兒〕講口語 phue-tsuí-phue 卡合理，煞採用文言音講 phi-tsuí-phi，真koh樣。
另外有「phi仔、竹phi、麵phi」遮个詞，毋知咁攏是「批」--字？若是按呢，即个「批」唸文言音 phi，佇口語詞出現遐濟，咁是意義有分化？抑是其實閣另外有別个漢字？
杜建坊先生：
漢字足費氣，咱共「批」个phi當作文讀音，事實未必然。「批」有影對泉腔有移越(i5-uat8)，毋拘咱換一个角度來觀察，以「比」做聲符个字，讀i算正常音：(保)庇、疪、枇(杷)、笓、(粒仔)疕、(牛)蚍、琵、砒(霜)…。顛倒讀e个字少：陛、狴…。
「批」，反切音「匹迷」，只字反切下字「迷」个聲符「米」就有i。
卜漳泉有e/ue對應个字真簡單，但是i/e對應个白話音，意思閣合軀个常用字足困難，除非是i/e/ue三音對應，親像「皮」就是好个例，「皮膚」 是ue/e(ir)；但是囝仔「皮皮」是phi……
(Facebook )
註：即篇頂日仔有貼過一遍，但是無杜先生个評論佮我个回覆，所以閣重貼--一遍。
Comments powered by Disqus.