中國「華為」、「中興」是間諜公司

美國眾議院情報委員會調查出中國通訊企業「華為」(HUAWEI)佮「中興」(ZTE)，從事間諜[kàn-tia̍p]活動，威脅著美國个國家安全。

即兩家間諜公司个產品，早就大量摒[piànn]入來台灣。我个安全意識有夠低，手頭竟然有一支手機仔佮一支 USB 3G 網卡是華為做个；閣一支手機仔是 ZTE 做个。

遮个通訊用品，我攏是佮電信公司（中華、威寶）縛約買來个。可見台灣个電信公司早就佮中共个透仔誠懇(先睏)做伙，咱美麗个 Formosa 規身軀个毛管空嘛予中共看了了去囉。

而且即兩支手機仔攏設計了足兩光，夭壽歹用。我一定愛趕緊共伊換掉。

註：

一、「透仔 thàu-á」指「探聽消息，托透[thok-thàu]機密个儂」，就是 spy 个意思。

二、「毛管空 mn̂g-kńg-khang」，華語〔毛細管〕。

(Facebook 2012-10-09)