佇南二高東山服務區 遠通櫃台，講台語問看無貼 etag 愛按怎繳費，櫃台小姐攏應我華語，而且反應像機器儂。後來有一个中年婦人儂行過來，看打扮敢哪是服務區个內場員工，小姐就一直佮伊講台語，閣真好禮親切。
我過路費付了、提著收據，欲走進前，就共伊講：「共汝建議一下，我攏用台語問汝，汝既然都會曉講台語，應該嘛愛用台語回答我。這才是正確个服務態度。」（最後迄句我歹勢，講無出來）
伊聽了，嘛是凊彩仔應我一句華語：〔喔謝謝〕，頭越咧，做伊入去後頭。
應該愛隨時提醒店員、服務人員：明明會曉講台語，明明儂客也攏講台語，是按怎煞毋講台語來做服務？－－這種提醒，我以前毋捌做，但是我決定以後愛把握機會來做，當然方式著盡量婉轉，總--是毋通啥乜攏無做，目睭金金看台灣上濟儂个母語，佇台灣公共場所全面消失，閣來佇家庭內也自然滅亡。
（原底發表佇 Facebook 2015-09-15）
Comments powered by Disqus.