討論「放假」个台語音

討論「放假」兩字个台語音：

一、先講「假」所有个台語音，咱勿管古早个「通假字」，像「格外 kik-guā」寫做「假外」, 「遐思 hâ-su」寫做「假思」。即種古董，現代無合用。

「假」个台語，本來是四个音：白話音 ké、kè；文言音 ká、kà。第二聲个音 ké(白)、ká(文）是形容詞，「不真」个意思；第三聲 kè(白)、kà(文)，是名詞，「工作上，照規定抑是個人因素个停歇」。

後來台灣通行，只賰兩音，ké 佮 ká。

唸做 ké ，像「真假」；唸做 ká ，像「放假」。

二、古早儂「放假」唸白話音，而且「假」會曉唸正確个勾破（破音）第三聲：pàng-kè。

三、照講若是「停歇」个意思，該當讀勾破陰去聲（第三聲）kà（文言音）、抑是 kè（白話音），但是六十年來台語儂漢文失教育，分袂清楚遮濟勾破音，所以將「休假」个「假」當做佮「假設」个 ká 攏仝音，攏唸做上聲（第二聲）：hiu-ká、ká-siat。所以「放假」就出現 pàng-ká、hòng-ká 个講法。

四、但是台語閣進一步演化，受北京話聲調影響，真濟儂講台語，攏是佇頭殼內不知不覺咧運用「華、台聲調對應規則」來唸台語聲調。

可比講將「網路 bāng-lōo」唸做「網路 báng-lōo」，原因就是「網」字，北京華語只有上聲（北京話第三聲）个唸法，北京話上聲个字，台語大部份嘛上聲（台語第二聲），親像「勇氣、美麗、水牛……」等等个前字攏是北京語上聲，對應台語上聲，因為台語詞，前字愛變調做高平調，遮个字「勇－、美－、水－」攏變高平調，所以怹拄著「網路」嘛不知不覺運用即種規則，唸做前字變高平調个 báng-lōo。

五、「放假 pàng-kè / hòng-kà」唸做 hòng-ká 个 ká 是台語老輩儂已經袂曉分台語勾破音个結果，但是怹猶原維持聲調上，本調佮變調个一致性，既然「放假」唸 hòng-ká，當怹唸「假期、假日」个時，自然會將前字「假」變調變高平調，唸做 ká-kî、ká-ji̍t。這就是先父个唸法。

六、但是少年儂無仝（包括佇遮个中年台語老師），怹「放假」是綴老儂講个，所以唸做 hòng-ká / pàng-ká，但是拄著「假期、假日」即个詞个時，煞不知不覺應用「華台聲調對應規則」，華語「假期 ㄐーㄚˋ ㄑーˊ」前字是去聲（華語第四聲），對應過來台語个聲調，通常是陰去（台語第三聲）抑是陽去聲（台語第七聲）（入聲無論），佇變調个位置，若選用陰去調，變調就變高降調，按呢，毋但「調類」華台有相應（攏去聲），連「調值」華台嘛仝款（攏高降調），這是上「保險」个唸法，可比「相片、再會、教育……」个前字，就是即種華台對應關係，所以「假期」怹就照即種對應唸做 kà-kî，前字變高降調，推轉去本調是台語第三聲。

結果致使「放假」佮「假期」無論是佇本調，抑是變調个位，「調值」攏是「高降調」，但是本調（調類）無仝，一个是第二聲，一个第三聲，出現即種無一致个怪現象。

七、若無即種分析佮理解，一味求「正音」，容易增加學習者佮社會个困擾佮 giâu-gî。

本來聲調愛勾破，無仝意思，無仝聲調，後來變無分，即種簡化現象卡無要緊。但是出現 hòng-ká / kà-kî 即種本調、變調無照規則、無系統个現象就真毋好。

這佇台語失教育、北京華語徛霸个台灣，情形蓋食力，親像我頂面所提个「網路」唸做 báng-lōo，但是「魚網、補破網」、「上網」猶原攏是 bāng。閣有「調查」綴老輩唸 tiau-tsa，但是「民調」唸做 bîn-tiàu，按呢亂使鬥[luān-sú tàu]，蓋毋好。

閣一个例，連老儂嘛失系統：「藥劑」唸 io̍h-tse，「藥劑師」煞講 io̍h-tsè-su。照台語个系統，該當是 io̍h-tse-su，是受北京話影響，才變 io̍h-tsè-su，但是連先父怹嘛按呢講矣。