今仔日是 2013 年 3 月 11 日，也就是 2011 年日本複合性大災難兩年滿，日本儂降半旗哀念。
311 大地動、引起海漲[hái-tiòng]、致使福島核電廠爆炸。
以馬英九、江宜樺做頭个外來統治階級，到今閣咧欺騙咱。馬英九講停建核四，會對國安不利。伊个「國」就是「國民黨」个意思啦！江宜樺先講台灣絕對袂發生福島迄種災難，後來閣講，若發生災害，甘願放棄幾千億个核電廠，嘛會顧全人民安全。
怹根本是咧騙痟个！核電廠出代誌，毋是放棄勿管就無代誌，彼輻射洩露根本封袂椆，福島電廠到今仔日猶原咧污染海洋，怹三十公里內个居民攏撤退[thiat-thè]變難民。咱个核一、核二、核四廠任何一廠，到時若發生即種災難，全台北市民嘛攏著逃命，咁走[tsáu]會離、咁走有路？
請問政府，欲按怎款待遮个儂？放棄台北市？叫蒙藏委員會空運數百萬台北儂去蒙古大草埔，睏蒙古包？即个夭壽政府，根本無欲處理啦！原能會个核災應變計畫只有 5 公里，其實啥乜攏無做、也無才調、無可能做，只有紙上作業佮可笑个庄頭小演習爾爾。
予一个無血無目屎、假仁假義假斯文个流亡組織、流氓[liû-bîn/bâng]集團統治，正是台灣最大个複合性災難。即个災難，已經持續六十年，未來會閣一直傷害咱。
頭前相片是日本住友商事佇大阪个關西區域總部辦公大樓，今仔日縋[luī]半旗，記念 311 災變。感謝 Iâu Bêng-uí 先生翕像，閣准我做分享。原出處網址是：
https://www.facebook.com/photo.php?fbid=10151343757012654&set=a.10151343756982654.1073741829.632292653
Comments powered by Disqus.