月初有一陣志工用心製作，佇 youtube 推出頂面即塊反核四个動畫「【戲說核四】309特別篇」，有袂少網友看了真呵咾，感覺足心適，也開始認同，贊成著愛停建核四。
但是製作團隊考慮了無夠周至，即塊影片背後所反應出來个政治意識佮語言意識，攏引起熱烈个批判。
佇遮，我針對伊配音所用个語言腔口來評論。廢核个議題本身，無佇遮討論，但是文章最後，我會另外插入一段影片，仝頂面迄齣，毋過有儂佇影片中另外加上評論文字，請參考伊徛佇核能佮政治觀點个看法。
即塊反核个bàng-kah，旁白是用「台灣國語」佮「台語」兩種話相透个方式咧講話。我相信配音者家己平常所講个「國語」絕對毋是影片中即種腔，但是咱咁通因為按呢就認定伊是咧歧視[kî-sī]台灣國語？
長期以來，國民黨醜化[tshiú-huà]台語佮台語儂个宣傳手段，其中一步就是佇各種影片內底，安排無身份、無衛生、無學問、無守法、無道德、外貌歹看个角色講台語抑是台灣國語，另外安排有身份衛生學問守法道德、外貌體面个角色講標準國語，做對照。
用按呢來共咱洗腦，予咱相信台灣儂是低等族群，而且台語是無水準个語言。
但是即齣動畫个出發點，是希望觀眾會凍接受旁白所講个話，也就是旁白是代表一个正面个角色，想欲傳播正確个智識觀念予儂知。伊咁有可能刁工採用伊所歧視个話腔，煞向望觀眾接受伊所播揚个理念？
至少佇有意識个心理層面，我相信伊是認為用即種腔，真親切古錐，觀眾會歡喜聽，看了閣四界轉貼出去，來鬥相共宣傳非核家園个理想。
即位配音者，就是三年外前捌製作一段「超人特攻隊－小傑的攻擊」台語配音版个朱修萱小姐，看過迄段笑詼片个，超過兩百萬人次！儂儂喝讚，大概無儂捌[bat]批評伊內底出現个台灣國語有歧視意味。
但是面對嚴肅个廢核議題，難免會惹出爭議。確實有袂少儂留言反映，認為有歧視。
即馬我換另外一个角度來看待：像配音者迄種年歲个青年，恐驚無才調自頭至尾攏講台語，但是伊閣有心欲予台語有較濟機會出頭，咱也看著怹確實有用心，收集袂少精彩个台語俗諺語，來配插佇影片中。連我嘛有偷學著 ^_^
按呢配音者若只是用伊平時迄種咱聽起來上自然个「華台語混用腔」來配音，觀眾可能就會嫌伊台語無純，程度䆀[bái]，也敢來配音？就準無按呢嫌－－因為民視八點檔，抑是濟濟電台个台語節目攏嘛按呢咧講話矣－－聽起來也會感覺傷平淡、無心適。
扑算也是因為按呢，伊才特別激迄種華語腔來混用台語，望欲提高「收視率」，達成宣傳目的。
以上用無仝角度來考慮，提供各位參考，並無下結論。
最後，我欲提出一點，其實咱台灣儂儂心肝底、下意識內，恐驚加減仔攏iáu是看袂起台灣國語。包括即塊影片个製作、配音者，甚至我本身，大概攏將歧視台灣國語个觀念深深內化到家己个骨髓內矣。
以下是仝一齣影片，但是有別儂加上評論，請參考：
Comments powered by Disqus.