〔長頸鹿〕台語叫做「長頷鹿」「麒麟鹿」

〔長頸鹿〕台語叫做「長頷鹿」「麒麟鹿」（台語文作者：潘科元）

**********

囡仔兄、囡仔姊，我是世界古錐个長頷鹿[tn̂g-ām-lo̍k]，因為我有足長足長个頷頸仔[ām-kún-á]，長長个頷頸个鹿仔，所以台語才叫做長頷鹿。

愛會記得哦，頷頸个頷[ām]，唸到尾--仔，喙唇愛合起來哦，am…ām…àm，長頷鹿。

我叫做長頷鹿，但是嘛會使叫做「麒麟鹿 kî-lîn-lo̍k」。本來，麒麟是中國古早个神話咧傳說个一種仁慈个神獸，也就是仁慈閣神聖个野獸。

古冊講麒麟个頭親像龍頭，身軀像馬，動作像鹿仔，尾溜閣哪牛尾，伊咧哮親像霆雷公，喙閣會吐火，足厲害！相傳，干焦佇國家太平、抑是有聖人出世个時，麒麟才會出現。

按呢照講阮長頷鹿是生活佇非洲，活跳跳个動物，佮中國个麒麟根本無tī-tāi。

但是佇明朝永樂皇帝个時，三寶太監鄭和帶領海船大隊，過番落西洋，去到東非，有帶兩隻長頷鹿轉來京城，進貢予皇帝爺，稟奏講彼就是麒麟。

永樂皇帝聽了，歡喜到袂顧得，伊扑算家己治理个國家，風調雨順、國泰民安，所以才會得著麒麟。後來連日本佮韓國嘛綴咧按呢號。

就按呢，阮才叫做「麒麟鹿」。無論汝喝講「長頷鹿」抑是喝講「麒麟鹿」，我攏會應聲：「M̋… 汝是欲請我食樹葉仔个腥臊是--毋？」

**********

音註：

1. 霆雷公 tân luî-kong：〔打雷〕

2. 過番 kuè-huan：以早福建儂，出海過去外國，就叫做「過番」、「過番爿 kuè-huan-pîng」。「番」是相對於「唐 tn̂g」「漢 hàn」來講个，往往有歧視个意思。但是後來也有儂用做中性个稱呼。

3. 風調雨順 hong tiâu/tiau ú sūn

4. 國泰民安 kok-thài bîn-an