語言有「正音」、有「俗音」，俗音若濟儂講，超過九十幾pha以上，就有可能會取代「舊正音」變做「新正音」。
像「組」个台語 本來是佮「祖」仝音，本調攏是第二聲 tsóo，但是咱早就慣勢將「組」唸做「租」第一聲 tsoo，這是日本時代留落來个「約定成俗」。
就台日大辭典个記錄，咱看會出，當時是 tsóo / tsoo 兩音咧互相競爭，所以「組合、組織、組長」即三个當時對日語吸收來个新詞，台日典攏有收兩種唸法：tsóo-ha̍p / tsoo-ha̍p、tsóo-tsit / tsoo-tsit、tsóo-tiúnn / tsoo-tiúnn。
但是照伊編排个方式，是佇 tsóo-xxx 个條目下面做完整解釋；但是佇 tsoo-xxx 个條目遐，叫儂參考 tsóo-xxx 迄爿。按呢我斷定台日典編者是將第二聲「組 tsóo」當做正音。這也符合傳統个閩、台語韻書所記錄、也符合漢文先生个傳承。
但是，經過幾十年競爭个結果，「組」唸 tsóo 正音，最後iá是拚袂過 tsoo 个俗音，所致到今仔日，咱聽著台灣一般無讀過漢文个老大儂咧講，差不多攏一律講 tsoo，毋捌聽過儂講 tsóo 矣。
所以咱會使得接受「組」本調唸第一聲，確實已經「約定成俗」，而且取得「生活口語个正音」地位，變成台語个特色矣。
轉來看當今「網路、網站」遮个新名詞，真濟儂將 bāng-tsām、bāng-lōo 唸做 báng-tsām、báng-lōo，聽起來煞親像 「蠓站、蠓路」，這是予北京話个聲調 帶衰著个。台語儂佇頭殼內不知不覺按照華語、台語 調類對應規律，進行錯誤類推个結果。
現時錯誤个 báng-lōo 佮正確个 bāng-lōo 即兩種唸法閣咧進行競爭，雖然錯誤个 báng-lōo 較贏面，但是袂使得講已經達到「約定成俗」个坎站，所以咱著愛認命接受个程度。
儂唸歌大師楊秀卿女士，自細漢目睭失明、毋捌漢字、當然也無咧看電腦、用網路，但是伊猶原會曉得唸出正確个 bāng-lōo，毋是「蠓路」，是按怎咱逐工上網路个目金儂，煞攏烏白唸？
台語老歌「補破網」就是佮「補破夢」仝音。俗語也有「火燒罟寮--無網（無望）」，即个「網」也佮「望」仝音。也就是「網、夢、望」即三字个台語白話音攏是 bāng 第七聲。
「網路、網站」前字「網」本調第七聲，變調應該變低調，毋是變懸調，是佮「夢路、夢站」仝音，但是佮「蠓路、蠓站」無仝音。
補充：「網」是有第二聲个唸法，但是彼是用佇文言音 bóng，親像「天羅地網 thian-lô tē-bóng」、「天網恢恢、報應甚速」[thian-bóng khue-khue, pò-ìng sīm sok]。若是白話音干焦會使唸做 bāng，「網」个台語自來都毋捌有 báng 即種第二聲个音。台語文言音唸第二聲，白話音唸第七聲，即種聲類對應情形是屬佇古音次濁聲母「上聲字」，佇閩台語个一種系統性變化。
關係 bāng-tsām 按怎予北京音帶衰著 个道理，請另外參考我个舊文〈「網路、網站」「院長、代表、附近」个台語音〉。
Comments powered by Disqus.