論臺灣閩南語字音字形語文競賽（台語音字比賽）

台語字音字形比賽，真濟先進苦練數年，猶原閣停留佇「題目寫袂完」个階段，但是這毋是因為伊袂曉寫，抑是無夠熟咧tùn-tenn，實在是隨儂寫字个速度無仝，按呢音字比賽煞變做咧比寫字速度？

台語音字比賽个題型、時間、比賽規則，是完全模仿華語文競賽个做法，問題是，現時台語文教育所需要个訓練佮華語文欲汰有仝款？咱有一大堆寶貴个田野調查錄音，需要轉寫做台語文，來完整傳承鄉親父老个智慧。咱也有一大堆寶貴个羅馬字文學、文獻通好讀、應該讀，這攏毋是華語文教育所需要个。

（當然台語羅馬字文獻是寫教羅，毋是教育部台羅，總--是，兩套高度相容，只要精通其中一套，半點鐘內就會得完全掌握另外一套。）

既然按呢，閣較實用、有效、有意義个台語音字比賽，題型咁無應該出規段个台語，予參賽者漢字轉寫羅馬字、羅馬字轉寫漢字咧？抑是出規句話个聽寫咧？而且也著愛有充分个比賽時間。

我有看過真濟儂，台語音字練足久，也得著真懸个名次，但是一小段个台語文都寫袂好勢，抑是寫袂慣勢，因為欲寫規句、規段台文个訓練佮兩字詞个訓練，層次根本完全無仝。 華語文書寫个比賽方式，若毋是比「語詞音字」，無，就是比自由發揮个作文，但是現此時足要緊个台語文書寫比賽，應該是頂面所講个「漢羅互相轉寫」佮「規站聽寫」，這是救台語蓋重要个項目。當然，也應該有台語做文比賽。

以上是三兩儂講四斤話，當局無咧共我 tsú-táu，不而過，我猶原會閣繼續呼籲。

註：「做文」有兩音，tsò-bûn（漳）、tsuè-bûn（泉），這是生活用語，若是寫「作文」是書面語，干焦唸 tsok-bûn。這是台語文个幼路，華語儂袂曉得。