論「購」、「軒」个台語正音、俗音

語音演變，有各種類型佮時代。「採購」是戰後个新詞（舊早叫做採買 tshái-bé、採糴 tshái-tia̍h），照講正音是 tshái-kòo/kiò，錯唸 tshái-káng 是因為誤將「購」佮字體接近个「講」當做是仝音字，這我叫做「形倚音縒 hîng#uá#im#tsua̍h」。

台日大辭典有收「購買組合 kòo-bué# tsóo-ha̍p#」，顯示當時个儂閣會曉唸「購」--字个正音。另外注意伊「組」是唸第二聲，這佇日本時代就有出現俗音 tsoo 佮正音 tsóo 咧競爭，到今俗音 tsoo 已經完全取代正音 tsóo。閣注意伊个聲調，「買」唸本調，這是較生疏个詞，當時个儂分做兩个變調組來唸。請毋通認定四字複合名詞一定前三字攏愛變調，彼是以偏蓋全，錯誤个理論。

若是「軒 hian」變唸 ian 可能時代較早，因為台灣南北漳泉全部攏變 ian，（有足濟歷史悠久个館閣名「〇〇軒」逐家攏唸 ian），這若無經過較久个時間，的確無可能遮爾和齊，但是字辭典攏無記著。即種現象毋是受漢字字形个影響，是因為 h- 聲母喙形、音值攏無明顯，真容易失落，這種音變真四常，佇人類各種語言攏看會著例，日語嘛蓋濟即款歷史音變，有真濟古早是は(ha) 行个音節近代變讀做あ(a)行--去。

咱先設法分析音變个類型，才閣看伊流通个情形來考慮，若是已經99%个儂攏按呢唸个「誤音」，可能就愛接受伊做「俗音」。