講俗語拆政府(004)「有蝕本頭家，無蝕本辛勞」

講俗語拆政府(004)【有蝕本頭家，無蝕本辛勞】[Ū si̍h-pún thâu-ke, bô si̍h-pún sin-lô]

台語【蝕本】就是【了錢、虧本】个意思，【辛勞】現代話叫做【員工 uân-kang】，就是頭家所倩个儂。

早頭个生理儂、頭家儂較忠厚，甘願家己了錢，嘛無愛虧待伊个辛勞，錢水閣較絚燥[ân-sò]，工錢、月俸也攏著照起工分發[hun-huat]予辛勞，所以才有即句俗語【有蝕本頭家，無蝕本辛勞】。

時代無仝，當今袂少惡質个企業主，侵提[tshim-the̍h]員工个薪水、退休金，了後惡性倒數[tó-siàu]、款錢閬港[làng-káng]个案例有夠濟。連政府嘛掩湖[am-ôo]奸商，聯手蹧躂弱勢个勞工。

世景遮爾厘末[lî-bua̍t]（景氣低迷），民間艱苦趁食，年底無賞金个儂真濟，獨獨公務人員，尤其是國營企業，替國庫趁無幾箍銀，甚至了錢 了裼裼[liáu-theh-theh]， 煞大小職員儂儂攏賞幾若個月。

原來怹叫做【公僕 kong-po̍k】，抑咱人民叫做【頭家】，所以【有蝕本頭家，無蝕本辛勞】，咱人民蝕本無要緊，怹公僕袂使歹過日。