本文
謝龍介台語字音真準？－－為「謝龍介說俗語」影片正音
第一集个影片：「謝龍介說俗語」
台南市議員謝龍介是學吳樂天講古个氣口咧質詢，有講著白話个俗語，也大量使用文言成語、套語，真濟轉貼即段剪輯影片个面友呵咾伊台語講了好。但是也有儂用「倯[sông]閣有力」來形容，這恐驚是一種污名化，心態上感覺佇議會講台語就是倯、無入流。
轉貼者聽袂出謝龍介佮吳樂天有仝款个問題：愛唸文言套語，但是字音無夠準。因為怹攏無受過台語漢文个訓練。
（以下个台羅標音，為著精確注明本變調，無使用一般咧表示多音節詞个連字號，用 # 號表示頭前字唸本調，下底線 _ 表示頭前字唸變調，雙連號 -- 表示頭前字唸本調，後接字唸輕聲。）
佇影片中，謝龍介講：「水能載舟，亦能覆舟。」伊唸 Tsuí# lîng# tsāi_tsiu# ia̍h_lîng# ho̍k_tsiu#. 「載」本調是第三聲 tsài，變調變第二聲才著；「覆」本調正音第四聲 hok，變調變懸短調，毋是第八聲 ho̍k 變低短調。
（2023-10-25補註：「覆」唸第八聲是通行俗音，像日本時代台語有吸收日語【覆面 ふくめん】，我細漢个時聽布袋戲就講做 ho̍k-bīn。白話字教會公報1953.12 是寫 hok-bīn；教會公報1961.11 是寫 ho̍k-bīn。）
「水」文言音 suí，白話音 tsuí，伊用白話音，若這無要緊，因為咱台語儂咧應用文言文佇生活中个時，本來就時常文白音混用，按呢較自然，像台日大辭典記錄「水落石出」，唸做 tsuí# lo̍k# si̍k# tshut#，四字攏本調，第一字「水」白話音，其他三字唸文言音。
「君子愛財，取之有道。」我聽一寡老輩个唸法是 kun_tsú# ài_tsâi# tshú# tsi_iú_tō#，我個人較贊成唸做 kun_tsú# ài_tsâi# tshú--tsi iú_tō#，兩種唸法，差佇「之」唸普通變調，抑是低調輕聲，總--是，「取」著愛唸本調。但是謝龍介唸做 kun_tsú# ài_tsâi# tshú_tsi_iú_tō#，伊學吳樂天將「取」「之」兩字攏唸變調，按呢毋著。
「怠忽職守」伊唸做 tāi_hoo_tsit_siú。「忽」只有 hut 个音，像「疏忽 soo-hut、忽視 hut-sī、忽略 hut-lio̍k、忽然 hut-jiân」。「怠忽職守」應該唸 tāi_hut# tsit_siú#，「怠忽」接名詞，這是生活較罕用个書面語動詞，所以「忽」字唸本調顛倒較自然、較好理解。
（2023-10-25補註：「怠忽#職守#」就親像布袋戲口白「有眼#無珠#，不識#泰山#」，其中个「識」字也是唸本調。）
「擔蔥賣菜，遮个凡夫走卒」，伊唸 tann_tshang# bē_tshài# tsia# ê_huān_hu# tsáu_tsut, 影片製作者字幕寫「凡夫」按呢配合是著，總--是，本來个成語是「販夫走卒」，應該著唸 huàn_hu# tsáu_tsut#，「販」本調第三聲，變調變第二聲。
「洪其昌」Âng_Kî_tshiong，伊講做 Âng_Tshî_tshiong，可能是一時口誤。
「不平之鳴」put-pîng# tsi_bîng#，伊講做 put_bîng# tsi_bîng.
配樂真好笑，但是也加強「倯閣有力」个觀感。
整體來論，謝龍介佇議會講按呢个台語，雖然真特殊，但是伊佇語言上个講究佮用心，確實通予咱肯定。若論到伊咧質詢抑是上談話節目所講个道理、內容，彼著愛另外批判。
面冊網誌留言
黃文達
無學寫字，講台語定定會烏白抐。
Lîm Sekiông
她上政論節目，我就跳過!
潘科元
若論到伊咧質詢抑是上談話節目所講个道理、內容，彼著愛另外批判。
Comments powered by Disqus.