讀批

我讀國校个時，有一段期間，阮爸爸逐工暗時，叫我提「國語」課本過去伊身邊，用台語唸課文予伊聽。我大部份攏唸會順，有幾个仔所在毋知按怎翻譯做台語，伊才小可共我教一下。

到高中抑是大學，有一暗，厝邊新發嬸--á 提怹囝个批來阮兜，叫阮爸爸唸予伊聽，我爸爸將即項任務交代予我，向望我發揮出細漢時所受个訓練。我看著批，才發現原來「國語文」个批信迄種口氣聲說[kháu-khì siann-sueh]，根本佮阮个生活語言一丈差九尺，若直翻照講，聽著會起雞母皮，足礙虐[gāi-gio̍h]。我一時無主意，只好將批信个大意簡單兩句話講予伊聽。

到今[tann]，教儂將華語文翻譯做台語，變做我个工課項目，但是我對已經過往个老爸、新發嬸怹兩位，猶原感覺真對不住。