大學聯考，考了填志願，我戇戇毋知總[tsáng]，選著政治大學个志願。讀大一無偌久，我著佇系學會期初大會，公開批評講，學校每一系，除了正常个系學會以外，閣攏另外含[kânn]一个國民黨籍學生組成，經費真濟个「聯誼會」，佇咧干涉系裡學生事務个運作。我險仔著予教官點油做記號。
政大迄陣，下晡一直攏是兩點才開始上班上課，六點下班。聽講本來有欲改革，但是職員無愛。怹有袂少儂，中晝時仔攏轉去學校附近个宿舍、厝裡睏晝。下晡欲改卡早上班，怹講歇無夠。
迄陣，去行政單位接接[tsih-tsiap]代誌，蓋慣勢看著怹「後母个面腔[tshiunn]」，職員對阮學生歹聲嗽，辦代誌延[tshiân]--一下是正常个。
有一擺，我坐公車欲去市區，佇路裡，看出車窗外，發見路邊發生車禍，一个儂摔[siak]倒佇路邊，袂振動[tín-tāng]。另外有一个無底代[tī-tāi]个阿啄仔[a-tok-á]過路儂，即時走過去迄个不幸个儂遐，跍[khû]落來，伸出雙手共伊扞[huānn]咧。我佇車頂，遠遠聽袂著即个外國儂咧講啥，毋過看會出伊充滿關懷个面容。
迄當陣，政大拄欲設立廣告系，進行了真順利。獨獨西洋語文學系有一位美國老師 Timothy Lane，徛出來公開唱[tshiàng]反對，伊認為「廣告」个本質佮大學追求真理个精神對衝。
學校共伊招去開會，自校長以下，一寡大頭--个，隨个仔隨个輪流共伊「開破」[khui-phuà]，欲叫伊放棄主張。伊个「滿大人話」(Mandarin)雖是講了袂䆀，當然袂凍親像遮个主管大人遮爾輾轉[liàn-tńg]，但是伊猶原一句一句沓沓仔[ta̍uh-ta̍uh-á]表達出伊堅定个理念。
尾--仔，我才想起來，即个Tim老師，著是迄工路邊迄个阿啄仔。
後來我去讀清大研究所，佇公告欄[nuâ]看著校長个告示，驚一趒[tiô]，因為歸世儂毋捌看過遐爾白話个公文書。閣去揣職員申請啥乜，每一个職員攏有夠親切--个。我後來會凍順利畢業，是佳哉有怹非常个主動熱心，共我鬥相共！
政大予儂叫做黨校，我佇政大著知知咧，無疑，去清大了後，兩間對比落來，對即點體會了閣卡深。
------
我先踮佇facebook發表即篇，有朋友回應講，迄陣个台大个職員嘛是按呢。毋知即馬遮个國立明星大學有變卡好無？
Comments powered by Disqus.