佇三民書局網站買著一批好冊，報逐家知：
一、陳俊斌. 2009. 《歷史的聲音與足跡：恆春民謠曲譜》（佮CD一塊）. 屏東縣政府。
二、簡上仁. 2010. Voices of Eternal Spring: A Study of the Hêng-chhun tiāu Song Family and Other Folk Songs of the Hêng-chhun Area, Taiwan.（《恆春之音：恆春調系列歌曲之研究，兼敘台灣、恆春地區的其他民歌》）（佮CD兩塊）. 屏東縣政府。
三、簡上仁. 《來唱囝仔歌》１、２輯（攏佮CD一塊）。愛智圖書。
四、許常惠. 2002(第17版). 《音樂百科手冊》. 全音樂譜。
前三部[phō]冊个台語歌詞，有用羅馬字（教羅抑是台羅）注音，表示即幾年个台語文運動有影響著其他个台灣文化工作者，予怹注意著精確表音來記錄台語个重要性。
當然，音樂工作者毋是語言工作者，難免有無完美个所在。像第一本無標聲調，第二本有標聲調，但是將 Sū-siang-ki 攏寫做 Su-siang-ki，表示作者受漢字「思想起、思相枝…」个影響，掠叫是第一字唸 su。
按呢毋著，恆春儂儂攏講是 Sū-siang-ki，第一字變調第三聲，本調是第七聲，根本毋是「思」字。迄種漢字寫法，是文人硬揣漢字來鬥个結果。
第二本是簡教授佇英國个博士論文增訂个，屏東縣政府無嫌伊寫英文（歌詞有漢字佮羅馬字），願意替伊出版，thang予儂呵咾。（而且閣賣足俗！）
Comments powered by Disqus.