頂一篇講著愛有台語音義系統整體性个概念，學生佇BBS看了，有回應問題，討論著「趨勢」个呼音。下面是引用。最後，我有寫一寡感想另外記佇即个blog。
> → windybluesky 推：老師,咁會使問講迄个"趨勢"哪會讀做chu1 se3
> → windybluesky 推：抑毋是讀做khu1 se3? 06/05/16
chu1-se3 才著。汝聽來个是錯誤个。
這著是為啥麼愛養成查字典个習慣个理由。外口个儂用台語唸漢字，往往是家治想，家治著，烏白提北京个話發音來亂套。
「區、軀、驅」(khu1)、「趨」(chu1) 北京話共音，但是台語無共音。姻會將「趨」(chu1)唸做 khu1 著是按呢亂套來个。
練習：請問「賄選」即兩字台語按怎唸？
提示：選舉期間，政府佇電視台做廣告，用台語唸著即兩字，至少捌(bat4)出現過兩種呼音，攏毋著。
→ masiroi 推：iu7 suan2 賄選？ 我ioh是iu7 suan2 06/05/16
→ windybluesky 推：賄選 hue3 suan2,老師汝講毋著个咁是將hue3呼做hue7?
→ masiroi 推：不過 台語線頂字典 字 个音 界濟... 06/05/17
主要愛參考頂學期叫恁買个「廈門音新字典」佮「彙音寶鑑」。
廈門音新字典，「賄」收兩音，hue2(上聲) 佮 iu7。
彙音寶鑑只有 hue2 个音。
上正確个音是 hue2, 佮上聲个「悔」共音。這嘛有符合漢語中古音。
因為台灣華語逐家「賄」攏唸去聲，佮「惠」、「會」共音，致使塊唸台語个時，毋是唸做 hui7（錯誤類推,想講佮「惠」共音）；無，著唸做 hue7（料叫是佮「會」共音）。
即種北京話佮台語少數一部份个字聲調無對應个，是上儕儂出錯个所在。
其實華語个「賄」嘛有上聲个讀法。請查教育部國語辭典網路版。
廈門音新字典另外收 iu7 个音。彼是民間唸走音去个。因為「賄」
个字形接近「宥、囿、侑」(iu7)。
民間台語呼音錯誤个情形，有兩大類，一類是予字形接近个別字个發音影響著，一類是受華語个影響。頭前迄類，真儕是佇華語个勢力益無啥麼影響以前出現个。
第一類个例：
「強調」(kiong5-tiau7)讀做 kiong5-tiau1, 為啥麼「調」會唸陰平，因為「凋、碉、鯛、雕、鵰」攏是陰平。
「故障」(koo3-ciong3)讀做 koo3-ciong1 因為「章、樟、璋、獐、彰」讀做 ciong1.
「賠償」(pue5-siong5)讀做 pue5-siong2, 因為「賞」讀做 siong2。
「賄」卡早个儂cuah8音唸做 iu7, 嘛是即類。
第二類个情形，是即五十幾年來受華語个壓迫，結果台語讀走音个所在，愈來愈儕攏是對華語个發音錯誤類推个結果。親像咱討論過个「趨、紀、舍……」，「賄」唸做 hui7 啦，hue7 啦，著是即類。
掌握以上个原則，然後一字一字去稽考伊个發音。等恁大二、大三以後，學著漢語中古音、上古音，會閣卡清楚各種漢語語音變化个鋩角(me5-kak4)。
台語線頂字典，本質上是收集真儕語料，共(ka7)扑做電腦个資料庫，予儂方便查。毋閣佇伊扑字个過程，是毋是有扑毋著去，彼真歹講。（當然，原底个語料有真儕來源，本身嘛毋是講一定著）
親像「台語摘譯台日大辭典」網路版，佮原版比較，我著發現袂少錯誤。抑台語線頂字典，因為來源複雜，又閣無註明出處，所以真oh4得進一步追蹤。
總是，袂用得一直干礁靠網路。
論甲真(lun7 kah4 cin1)，「正音」即種問題真oh4講。有兩種極端，一種是要求眾儂(cing3-lang5)復古，完全按照古早文獻稽考(khe1-kho2)出來个結論；一種是要求字典編者完全按照社會个現實來決定發音，看即馬多數儂按怎講，著順趁(sun7-than3)民意。
行(kiann5)極端著是行te2路，毋好。卡妥當兮做法，文言文講「中庸(iong5)、折衷(ciat4-thiong1)」，白話講「半奸忠(puann3-kan1-tiong1)」。也著是講，毋通對家治个研究傷過頭死忠，押勒(ah4-lik4)逐家照汝个想法行；但是嘛毋通傷無品，儂喊(han2)綴儂喊，完全失去理想性。總是，半奸忠即條路是按呢 ih-ih-uat4-uat4，無咧好行，一時風駛一時帆。有當時仔會使軟索遛豬(nng2-soh4 liu3-ti1)，有當時仔姑不將，嘛著參儂做伙落去翱浴(ko7-ik8)。
我共學生講：「賄，上正確个台語音是 hue2。」毋閣，是毋是因為研究出來是即種結論，我著要求學生一定愛按呢唸呢？「賄」讀做 hue2，佮「火」（漳腔語音）共款，實在予儂太意外咧。也莫怪自古以來，民間攏唸袂準。毋是「形倚音cuah8」(hing5#ua2#im1#cuah8)，唸做 iu7；著是綴北京話凊采鬥。Douglas 牧師 1873 年个廈英大辭典，著有收 iu7 个音： siū-iū, to receive a bribe. siū lâng-ê-iū, to receive a bribe from a man；伊另外將 hue2 當做讀冊音：hóe-lō. kong-hêng (R.), mandarins taking bribes openly.
阮老父嘛捌問--過--我，講「賄選」个「賄」台語按怎呼，我共講 hue2。在台語程度非常好个伊聽起來，我根本是咧唸北京話个 ㄏㄨㄟˋ。無ta7-ua5。
（「形倚音cuah8」是我創造个術語，請注意四字攏讀本調。佮「有邊讀邊」(iu2-pian1 thok8-pian1)無完全共款。像「坊」台灣北仔話逐家攏唸ㄈㄤˇ，著是一个例。若是有邊讀邊，讀正確个「方」第一聲著好矣，是按怎假爻卜唸第三聲。因為「坊」佮「仿、訪」字形卡倚，平平攏有兩爿，佮「方」个字形差卡遠，所以著綴「仿、訪」个音唸cuah8去。）
Comments powered by Disqus.