「軒」、「兮」台語音

「軒」--字，佇古早流落來个文獻，像泉腔个《彙音妙悟》，漳腔个《彙集雅俗通十五音》、《廈門音个字典》，攏記 hian，但是目前民間聽會著，無分漳（像宜蘭）、泉（像鹿港），攏唸 ian。

就音理來解說，這是 h- 聲母失落个關係，這雖然算是一種縒音，總--是，即个 h- 佇人類个各種語言攏真容易失落，像英語 what / why 變做 wat / wy。

教典將 ian 歸類做「軒」个白話音，算是一種勉強个歸類：縒音（錯音）通行了後，號做「俗音」，一旦閣較通行、普遍，就算做「白話音」。

「兮 hê」變「ê」也是仝款音理，「兮」本是文言感嘆詞，佇漳泉傳統韻書（彙集雅俗通十五音、彙音妙悟）攏有 h- 聲母，但是成百年來个漢文先，無論漳泉，「兮」往往唸做無 h- 聲母个 ê（「兮」佇句尾做感嘆詞，通常實調是低調輕聲）。

因為按呢，記錄口語个歌仔冊，真愛借用文言字眼「兮」來表示口語「我 ê、汝 ê」迄个 ê，時常佮「个」--字混用。