〔輕軌〕台語按怎講？

即篇是舊年 2015 年 10 月 20 日，佇 Facebook 所寫个，後來三不五時有儂講起即个問題，所以轉貼來遮：

高雄「環狀輕軌」鐵路通車矣。咱來思考看〔輕軌〕台語按怎講？以下我提出兩个方案：

一、參考日本時代个做法，當時有建設「輕便鐵道」（和製漢語），是用儂工 捒[sak]咧行个，台語儂照字唸台語文言音 khing-piān。照按呢，〔輕軌〕个台語音是 khing-khuí。「環狀輕軌」是 khuân-tsōng# khing-khuí#（「狀」先免變調，將來逐家唸久較慣勢了後，就會自然變調。）

註：「軌」字甘字典收兩音 kuí、khuí，實際應用上，佇台日典有收「軌道 khuí-tō、路軌 lōo-khuí、單軌 tan-khuí、鐵軌 thih-khuí、脫軌 thuat-khuí」 ，「軌」字攏唸送氣聲母 kh。

二、「軌」現代台語儂較生疏，所以調整講做「輕鐵 khin-thih」，兩字攏取白話音。按呢台灣目前就有「台鐵 Tâi-thih、高鐵 ko-thih、輕鐵 khin-thih」即幾種。

註：照兩條鐵枝个闊度來分：阿里山森林火車是「三分仔車」、以早載甘蔗个是「五分仔車」(762mm)、目前縱貫鐵路是「七分仔車」(1067mm)、高鐵是「十分仔車」符合國際寬軌標準 1435mm。

補充：「輕鐵」即个詞，台日典有收，當時是指「鋁」，唸做 khing-thih（「輕」字文言音）。不而過，「鋁」个現代台語，主要是講「輕銀仔 khin-gîn-á」佮 a-lú-mih 兩種，也有業界个儂講怹是咧做「鋁窗 lī-thang」。

「輕鐵」指「鋁」个用法，大概當今真罕用。按呢來看，無論就使用率、語境，抑是發音來論，khing-thih 攏佮我佇遮所提个「輕鐵 khin-thih」會凍區別。