重學 Perl 處理台語文資訊

網站開發語言內底，perl 佇 2004 年跤兜，上蓋興旺，尾手退流行，漸漸予 python / php / ruby / Ajax 拚過矣。當年我嘛捌利用 perl 寫過一个小小个個人網站，予儂查揣漢字台語音，總是，後來著無閣耍矣。

最近閣將 perl 抾轉來餾，發現伊對 Unicode 个支援愈來愈十全[tsa̍p-tsn̂g]，哪研究文件哪用伊个新功能，寫一寡小程式來處理台語文資訊，幫我校對我做个白話字編碼表，有掠著一寡錯誤，袂䆀。

除了 Unicode 編碼，也試看舊底中文碼的轉換。拄才，將 GB2312 字串 轉過去 Big5，想講毋知簡體中文「总干事 吃肉干 干你事」，咁會凍正確轉做正體中文「總幹事 吃肉乾 干你事」？

Firefox 頂面个「同文堂」外掛，會曉共伊轉做「總幹事 吃肉乾 幹你事」，算是真巧矣。

若用 perl 的 Encode::HanConvert 模組个 gb_to_big5 函式轉出來是「總幹事 吃肉幹 幹你事」，若是先將 gb decode(解碼) 成 perl Unicode 閣轉來 big5 著變成「總榦事 喫肉榦 榦妳事」。「干」變「榦」、「吃」變「喫」，上奇妙个是徛人爿个「你」煞變做女字爿个「妳」。

我看，台灣中文佮中國中文，比美國英文佮英國英文个差別，大濟咧喔！