銀河个台語

「銀河」个台語，各位咁會曉講？教育部辭典有收「河溪 hô-khe」即个詞，但是有儂反對，主張講：毋捌聽過「河溪」，「銀河」才是現今个常用詞，所以只要收「銀河 gîn/gûn-hô」就好，將「河溪」提掉。

一个語言，有愈濟「同義詞」，表示即个語言表達力愈強，愈有活力。真濟文學家認為，其實並無「完全个同義詞」，每一个表面意思仝款个「同義詞」，其實攏含有無仝个氣口[khuì-kháu]、風格、佮文化意涵，所以「類義詞」才是卡精確个講法。

一方面，咱个台語退化甲足傷重，老大儂會曉講个台語，到咱即沿个（五十幾歲、中年以下）有太濟攏流失去。像我有限个台語生長經驗，嘛毋捌聽過「河溪」，但是咱愛用顧謙心，去請教佇生活經驗中，定定看會著「銀河」，蹛山頂抑是無光害个庄跤个老輩儂，看怹按怎講。

教育部辭典有列出台灣十个調查點，有八个點个老儂，攏講「河溪」，只有兩點是講「銀河」。我請恆春个朋友替我問，伊問著佇牧場出世，一世儂蹛恆春个六十歲儂傅[Pòo]先生，伊就是講「河溪」，無講「銀河」。伊講「牛郎[gû-nn̂g]織女佇河溪相會」，可見這「河溪」毋是「銀河」个「同義詞」，是有寶貴文化意義个台語詞，袂使直接用天文名詞、書面語个「銀河」來取代。伊講嘛有儂講「天溪 thinn-khe」抑是「天河 thinn-hô」，但是「河溪」卡通俗。

日本時代个台語辭典，有收「天河[thian-hô]、銀河、雲漢[hûn-hàn]、河溪」遮个類義詞，將河溪列佇上後壁。但是照以上來看，「河溪」才是台灣前輩上捷講个，咱應當珍惜，毋通因為生份，煞來放捒伊。

宜蘭五十幾歲个先進，嘛講怹自細漢攏講河溪。可見自台灣東北頭到台灣尾，「河溪」就是正港个台語詞。不過，有所在佇即个詞个「河」--字，h聲母已經lak無--去，變成ô-khe、ôo-khue。

因為家治袂曉講，就講這是「化石」語言，無需要閣使用，煞無欲去請教老大儂、做田野調查，這毋是咱欲復興台語文化該有个做法。