閩--字本源無歹意

「閩」，說文解字「東南越，蛇種。从虫門聲。」是指古早福建一帶个民族，自認家己是蛇个後代。

【虫】即字个甲骨文，就是畫一尾三角頭个蛇。【虫、它】兩字攏是【蛇】个古字，後來用途才分化。

蛇祖先 生儂，即種人類起源說，毋但福建，台灣原住民像 Paiwan 嘛是按呢，講怹頭目个祖先是百步蛇卵孵出來个，平民个祖先是龜殼花卵孵出來个。百步蛇是 Paiwan 个圖騰。

連所謂華夏民族也講怹个開基祖，名女媧[kua]（母系社會），女媧个形象就是儂頭蛇身，佮伊个兄哥兼翁婿伏羲相交尾（古早圖像畫怹兩个攏儂頭蛇身），建立婚姻制度，生湠出濟濟人類後代。但是第一代个祖先會使兄妹結婚，了後就不准，真奇妙。

即種上古个傳說，煞佮近代科學个進化論，有相通个所在——儂是非儂演化來个。

按呢欲講【閩】字个造字本源帶有歧視，講袂過。其實只是客觀反映先民傳說。

歷史一目nih 行到宋朝，自認是蓋高尚萬物之靈个理學家，有四大學派【濂、洛、關、閩】，其中个【閩學】就是朱熹夫子所建立，伊是佇福建講學，所以人稱【閩學】，這的確也是無輕視个意思啦。

咱若用當今个價值觀來評判古早文明，有時會差大碼。