本文
細漢讀國小，學校就佇阮兜邊--仔，所以逐工中畫攏會使行轉來厝裡食飽才閣去學校睏晝、繼續讀下晡。學校無倩儂顧口，出入免報備。
其他个同學無我遐好命，蹛較遠，著愛家己紮便當。當時學校毋但無辦營養午餐，連炊便當个設備嘛無，同學逐个 逐工攏食凊飯菜。
而且學校也無飲用水，怹閣無慣勢帶 sui̋-tóo（水壺），當時我也無去注意怹是毋是擋規工全然無啉半喙茶，抑是走去灌無衛生个水道水（毋是自來水，是地下水，阮遐至今無自來水）。毋過，怹有儂有時會來共我討我帶个茶去啉。
我个儂算不止仔孤獨[ta̍k]，但是儂見[kiàn]來討茶食，無第二句話我就斟[thîn]予伊。有時阮媽媽會共我攢[tshuân]高麗茶，阮同學山豬袂曉食米糠，煞嫌苦呸hak-ka̍k，我也無怪怹。
教室嘛無電火，烏陰天光線䆀，嘛是按呢咧看烏枋、看冊、寫字。
真濟查埔同學攏赤跤來讀冊，有儂 規年迵天 穿短褲（藍色个），一--來是身體有夠勇，會堪得，二--來是家境無通[thang]好。有一日大寒流來，我才第一擺看著伊穿長褲，毋知幾年前買个迄領khah-khih褲，伊今[tann]穿起來已經變七分褲囉。若是查某囡仔就攏有穿鞋，雖然閣算是重男輕女个時代。
到甲國中，學校才有炊飯間，教室才有日光燈，但是猶原無營養午餐、無電風。
即馬个國中小攏有辦營養午餐，但是蓋濟校長、承辦人員共廠商收 khoo-mí-sióng，種種个歪哥步數講袂得了，致使菜色真䆀、真少，害遐个當咧大个學生囡仔袂輸咧食䊩。
面冊網誌留言
Nina Iûnn
這篇寫了誠口語化，親像坐對面聽你講話。
Ong Siokchhiu
潘老師你是當時入國中，我1969，1970佇萬丹國中教兩年，和恁叔仔捌同事過，離開後恁嬸仔入去，聽講接我那班做導師，用漢字寫台文，對我來講是真大的考驗，請多加指教。
潘科元
王老師，免細膩 😊
王昭華
中晝頓食飽照講是愛轉去學校睏晝，毋過阮遐的學生囡仔攏集集佇人店口看電視搬布袋戲，下晡才咧盹龜。
Yun Chiang
藍色个短褲敢有啥物特別的意義？無老師你nai2記遐清楚？
王昭華
歹勢插話：阮彼个時代小學生的學生褲學生裙攏是藍色的。（阮會講「khóng」色，短褲閣加ㄧ个「仔」）
Yun Chiang
王昭華 老師你好，多謝！原來是按呢！我是1991年生的，我會記阮媽媽佇我國小一年的時陣，嘛有共我做兩領藍色的裙，毋擱穿無半kai2，小學就無限制愛穿白衫藍裙的制服啊XD
潘科元
當時个國小、國中男學生个制服短褲是藍色个（迄種藍，我毋知有算 khóng--ê無，感覺 khóng--ê 閣較重色），長褲是塗黃色个 khah-khih(卡其)褲。 感覺「短褲」是外褲，「短褲仔」是 phàn-tsuh :v
潘科元
會記得國小女學生个長褲，迄種深藍，講 khóng--ê 較(愈)適合。
劉建仁
khong2 是日語”紺”，日本人講是青佮紫混合的色，中國人講是”深青透紅的顏色”。(紺，ㄍㄢˋ)。
Tiunn Siok-tsing
老師,我也卜啉蔘仔茶,我絕對袂嫌苦teh8-teh8. ^^
潘科元
Jane, 視訊讀冊會个時，才用網路傳過予汝鼻芳 😊
張翠苓
我看siuⁿ緊
看做高麗菜飯
想講同學哪會嫌苦
Jane Chang回應…閣倒轉看
哈…哈！！
白麗芬
老師，我的大學同學講敢若佮你是國中的同學，若按呢，咱嘛會使算是「ㄊㄨㄥˊ ㄒㄧㄝˊ」XDD
潘科元
Aih-ioh！平平是「銅鞋」，白老師看起來遐青春，我看起來哪會遐臭老咧？
白麗芬
潘老師過謙矣！平平是銅鞋，老師遮gâu，阮遮頇顢，實在見笑。
Mickey Lee
若按呢 ，潘老師嘛誠少年！
白麗芬
Mickey Lee，哈欲到今你才知！
Lîm Sekiông
我个儂算不止仔孤獨[ta̍k]，但是儂見[kiàn]來討茶食，無第二句話我就斟[thîn]予伊。(這樣不孤獨[ta̍k]啦!)
Comments powered by Disqus.