阮，文言音 guan2, 字姓、國名、樂器名，三種意思。做字姓用，讀白話音 ng2, 這是泉州音；若是漳州音是 uinn2, 我迄工聽儂唸 nui2, 毋著。
若是台語个口語 guan2 【我們】，民間借用共音个「阮」字來表示。彼是借音字，毋是「阮」即个漢字本身佇古漢文著有【我們】即種意思。
【我們】講 guan2, 是漳州腔；若是泉州腔愛講 gun2。佇台灣，因為漳泉濫个關係，足儕儂搞(kau2)袂清楚 guan2/gun2 兩音个關係。偏泉腔个地區攏講 gun2, 但是偏漳腔个所在个儂，真儕袂凍正確理解 guan2/gun2 只是單純个腔口差別个問題。姻講：「gun2 是『我』个意思，但是有 sai1-nai1-khui2，親像講 : "gun2 bo5 ai3" 等一是北京話个『人家不要』，佮單純个『我』有分；抑(iah4) guan2 是【我們】个意思。……」
無論 guan2 抑是 gun2, 共款攏是【我們】啦。泉州儂个 "gun2 bo5 ai3", 漳州儂著是 "guan2 bo5 ai3" 啦，共款攏會凍表示【人家不要】的意思。汝會感覺 gun2 bo5 ai3 卡 sai1-nai1, 主要个原因是流行歌攏唱 gun2。台語流行歌是日本時代才開始个，迄陣唱片公司攏佇台北，姻揣真儕台北歌手來演唱錄音，才時行(kiann5)起來个。遮个歌手是泉州腔个，所以講 gun2。流行歌攏是塊表達愛情个卡儕，予遮个女歌手 gun2 一下久，汝袂感覺 sai1-nai1，骨頭嘛先酥了了矣。
所以用「阮」字來寫 guan2【我們】，應該是先對漳州腔開始，紲落來，泉州腔个 gun2 嘛乘紲(sing7-sua3)借即字來寫。毋閣按呢佮「阮」本來个字音 guan2 著有差矣。
「阮無愛」佮【人家不要】即種表達法分析起來有一个共同點，著是無直接自稱「我」，改用卡含糊(ham5-hoo5)个講法。「阮」是複數代名詞，無針對我個人；抑【人家】袂輸是塊講別口灶，嘛毋是塊講我個人。所以伊原底是婉轉个修辭，「阮無愛」其實只是「我無愛」，用複數代名詞來取代單數代名詞，因為講个儂个口氣、表情、體態，久來，予儂感覺 sai1-nai1-sai1-nai1。
當然，今仔日我若是代表工會出去佮董事會談判，姻開个條件我袂接受，共應講：「gun2 bo5 ai3」。這著是【我們不要】，絕對毋是【人家不要】。所以「阮無愛」即句話，看款情形，指稱个主體可能是複數抑是單數－－【我們不要】佮【我不要】。頭前迄種是本義；後壁即種是婉轉个修辭，而且佇語用上tiann7-tiann7含(kann5)有 sai1-nai1-khui3。講話者甚至有時陣刁工講出即種話語來含糊其詞(ham5-hoo5 ki5 su5)，工會代表講「阮無愛」，到底真正有反映工會多數會員个民意無，抑是只是伊個人个意思？彼著愛請伊伸(chun1)手摸家治个心肝囉。
台語另外閣有 lan2【咱們】，寫做「咱」是借用北京話方言字，算是訓讀。
lan2 佮 guan2/gun2 个差別，本文个讀者應該知影才著。
Comments powered by Disqus.