我去指導台語朗讀，朗讀稿有一个詞「離鄉背井」，學生表示，怹老師講是唸做 lī-hiong.-puē-kíng。
我應講「井」字並無 kíng 的音，除非朗讀稿寫做「離鄉背境」，「境」才是唸 kíng。
「井」文音 tsíng，白話音有分漳泉，漳腔 tsénn，泉腔 tsínn，「離鄉背井」是戰後台語才對書面語（章回小說）抑是華語吸收、通行起來的「新」詞，而且性質上照講是文語，唸 lī-hiong-puē-tsíng 應該是較理想，不而過，我聽著的通常是尾字唸白話音 tsénn / tsínn，原因可能是「井」的文音 tsíng 逐家較生疏，按呢唸無語感。
臺日大辭典無收「離鄉背井」，陳修先生《台灣話大詞典》就有收這个詞，尾字的音也是 tsénn，但是伊是四字攏採用漳腔，包括「鄉」字唸 hiang 無唸優勢音 hiong，所以伊是唸 lī-hiang-puē-tsénn。
綜合起來，指導採用優勢腔的學生朗讀，唸 lī-hiong.-puē-tsénn 是上妥當的。當然，若是宜蘭、桃園、台中、南投等等漳腔區的學生，講 lī-hiang.-puē-tsénn 無問題；若是台北、新竹、中部海口等等的泉腔區，著教伊講 lī-hiong.-puē-tsínn。
我轉來了後，半暝精神，倒咧píng來píng去，閣想著這个問題，雄雄才智覺著這个毋著的音 lī-hiong.-puē-kíng 是按怎來的。
原來這是將華語音 ㄌㄧˊ ㄒㄧㄤ ㄅㄟˋ ㄐㄧㄥˇ 其中的「ㄅㄟˋ ㄐㄧㄥˇ 」牽對「背景」去，既然「背景」台語唸 puē-kíng，所以伊 ㄌㄧˊ ㄒㄧㄤ ㄅㄟˋ ㄐㄧㄥˇ 就唸做 lī-hiong.-puē-kíng。
也就是講華語「背井」、「背景」仝音，雖然台語事實上無仝音，但是因為台語人母語失教育，所以咧唸新詞的台語音的時，往往會不知不覺借華語來進行類推，將華語仝音的字詞當做台語也仝音，「背井」的台語音伊無熟，但是「背景」的台語音伊真熟，結果就將「離鄉背井」唸做「離鄉背景」去矣。
華語仝音的字，台語有一部份也仝音，但是也有真濟無仝音的，台華雙語人佇潛意識[tsiâm-ì-sik]借華語來類推台語音，結果推了毋著去的例，佇半世紀以來的台灣社會愈來愈捷發生，像我定定咧講的【捷運 tsia̍t-ūn】唸做【節運 tsiat-ūn】嘛是。
補充：有學者指出，「背景」的正音是 puè-kíng（「背」有勾破音，動詞唸 puē，反背意；名詞唸 puè，尻脊意）。我欲講的是，「背景」這个詞，其實本底也毋是在來詞（但是比「離鄉背井」較早進入台語，使用率也加足懸）。1873年廈英大辭典無收，1923年台南巴克禮牧師廈英典補編才有收，1932臺日大辭典下冊也有收「背景」，註明來自日語，廈英典補編佮台日典的音攏是 puē-kíng，佮目前通行音仝款。統計白話字教會公報的使用情形，講 puē-kíng 的有 55 篇，講 puè-kíng 的有 21 篇，較無一半。
Comments powered by Disqus.