頂港、下港

阮屏東儂無咧講「阮是下港儂、阮兜蹛下港、我欲轉去下港」即種話，阮是講「南部」、「屏東」。

用「下港」稱呼南部，是中北部，尤其是台北儂咧講个。有寡台北儂較自我中心，台北城外佇伊个心目中攏是下港，連基隆、東北海岸攏算下港。

所以毋通想講「下港」即種講法較有「台語味」，就時常對阮講「恁下港」按怎拄按怎，因為阮聽了無特別歡喜。

有儂根據文獻，講「頂港」是淡水港為中心个北部地區，「下港」是以安平港為中心个南部地區，而且頂港、下港个分界就是濁水溪。

準做語源是按呢，「頂港」「下港」早就變做大概仔个相對觀念爾爾，佇民間日常使用，並無分甲遐真。

像1931年台日大辭典解說「頂港／下港」，第一義項是指「頂面个所在、上游／下面个所在、下游」，第二義項就是「台北儂稱呼宜蘭一帶／台北儂稱呼中南部」。可見早佇日本時代，「頂港、下港」就已經是含糊个概念矣。

字面上，「頂港」相對「下港」，像俗語「頂港有名聲，下港上出名」即句通[thong]儂知，但是實際上佇現代台語，「頂港」因為以台北做中心，已經主體化，逐家罕得閣單獨提起「頂港」，干焦「下港」定定講，中部儂也是按呢稱呼南部，哪有要意所謂濁水溪是頂港、下港个分界即種「定義」咧？

「台灣南部」佮「下港」个連結，難免佮「被邊緣化」个過程同齊咧進行。中北部儂平常時只有提起「下港」，無咧講「頂港」，只講台北、桃園等等明確个稱呼，抑是講北部，獨獨阮南部有予儂叫做「下港」，按呢阮个khi-móo-tsih咁會好？

當然，真濟儂講「下港」个時，伊心內確實並無看輕南部个意思。