1853 【養心神詩新編】，佇冊頭个「讀法論敘」有講：舊編是寫文言，新編改做「白話土腔」（廈門話），予儂現讀現聽就明瞭。文字形式是漢字，字邊有圈點个，「就字讀字」；其他个字著愛「將字解說白話」。伊所謂白話，包括漢字个白話音佮訓讀音。
作者真貼心，毋但標明文讀，若用倚音个借音字，閣有註聲調，像【蟲拖】，佇拖--字註「音下去」，表示愛唸第七聲，所以加有夠好讀！其他个閩台語通俗歌仔冊看袂著即款記號，大量使用借音、倚音字。
到 1873 年，【養心神詩】有另外出白話字版（漢字版猶原有繼續出），咱先讀漢字版試滋味，才閣讀白話字版來對照，會凍體會著一般个漢文用字佮閩台語白話个出入，得著足大个啟示！
尤其是否定詞，咱儂話有 m̄ / bô / bōe / bē / put / bo̍h / mài，一般漢文有「不、無、毋、未、莫、勿」（官話文閣有「沒」），用法無完全對應，因為按呢，採用傳統漢字个台語文獻个否定詞，時常予咱僫得確定伊个呼音。
像第一首第4句「一世稱呼永不息」是「bô soah」，「不」唸 bô；第16句「無出上帝心以外」是「bô chhut」，「無」也唸 bô；但是21句「上帝之恩講不盡」，即个「不」唸 bōe（廈泉腔 bōe，漳腔是 bē）。第二首第4句「無時無刻不敬拜」bô-sî bô-khek m̄ kèng-pài，「無」唸 bô，「不」唸 m̄。
也就是雖然用無仝字「不、無」，但是閣唸仝音 bô；用仝字「不」，煞有可能唸三種音「 bô、bōe、m̄」。
現時教育部推薦用字有固定對應：bô 寫做「無」；m̄ 寫 「毋」；『會不會』寫「會抑袂」；『尚未、還沒』寫「猶未」；put 寫「不」；mài 寫「莫」；bo̍h 照講本字就是「莫」，但是教育部學者多數毋捌即个 bo̍h，所以將 bo̍h 當做無存在，煞將「莫」字提來寫 mài。
雖然按呢，教會部台語學者，用心計較，來建立系統化个台語漢字用法，猶原通予咱肯定。仝款內容，用教育部推薦用字來寫，比用遮个古早文獻个用字來寫，咱來讀，加足輕可！
Comments powered by Disqus.