香欲燒 著愛燒好香

目前市面上有真濟金、香，品質無通好，內中个化學成分燒過了後，對人體健康有不良影響，這是事實。

好香 會淨化空氣、安神定志、幫助修行，所以世界各大宗教加減有用著香，原料百百種，無一定是用燒个。總--是，咱若照古法，取天然材料來做香，大概攏真好。

若真正欲滅香，就是破壞宗教文化，違背憲法个惡政，但是民眾佮業者也著改變觀念，轉做重質無重量个做法，毋通提bái香、bái金來燒鬥濟个，按呢長期落來會致癌免講，當場就薰甲頭殼 gông-tshia-tshia、目油 tsha̍p-tsha̍p-滴矣，這是欲按怎提升咱个靈性？好个宗教儀式咁毋免幫助儂提升靈性？

咱若看著某儂真有福氣，就會講伊「頂世儂燒好香」，毋知按怎，當今台灣儂煞足愛燒bái香？按呢後世儂就無福囉！

最後，我來講一組「阿元新語」：

Tíng-sì sio hó hiunn, tsit-sì hó senn-tiunn; tsit-sì sio bái hiunn, āu-sì bái bīn-tshiunn.
頂世燒好香，即世好生張；即世燒䆀香，後世䆀面腔。