高中生台語文化夏令營IV起鼓

今仔日是阮台語系主辦个第四屆全國高中生台語文化夏令營起鼓第一工。因為一寡台語系內部歷史上个因素，即个大活動攏是大一升大二个台語系學生塊佇歇熱主辦。今年主辦个即屆，怹个導師是頂港有名聲、下港真出名个丁鳳珍老師。即屆个台語營，無論資金，抑是師資各方面，攏資藉[tsu-tsià]著丁老師个苦勞佮儂脈，才有通遐爾豐沛[phong-phài]、多元、鬧熱。

早起，我塊趕系裡網站首頁个改版佮資料更新。中畫趕去學校，參加點半个開業式[khai-gia̍p-sik]，了後繼續趕做網站。無機會通聽著第一个時段，金枝演社王榮裕導演个課，真無彩。無閒到暗時七、八點，食飽，才入去聽蘇晏德[Soo Àn-tik]老師个「講台語變魔術」个課。

蘇老師亦會曉寫拼音、教台語，亦會曉開課教魔術，口才好、手藝好，囡仔聽了歡喜甲-。即種人材真僫揣閣-。

佇語言教學个中間，配tshah、運用一寡siânn儂好奇个魔術、把戲[pá-hì]，有影足儹。愛好好仔共蘇老師偷學--幾步仔。

毋免特製个家私[ke-si]，靠手路活動个魔術，下昏我有學著兩步，一步是用兩條軟索，一步是用兩條樹奶[ling]，背後个原理對同[tuì-tâng]。