魚刺

讀國校个時，逐工中晝攏行轉去阮兜食晝，阮厝佇學校邊，過街路著到。六年有一日中晝，媽媽閣煮我上愛食个ka-bāng魚，毋知按怎，我煞食甲去予魚刺鑿[tsha̍k]著，媽媽叫我大喙食幾丸仔白飯落去，看會凍將khê佇嚨喉个魚刺乘紲[sīng-suà] gap-gap吞落去腹肚內袂？試足久，無伊法。

姑不將，媽媽挓[the̍h]錢予我去揣醫生。迄時阮萬丹iáu無專門个耳鼻喉科，阮嘛無想著講先予隔壁無牌个外科看昧咧。爸爸出去辦貨个款，無佇咧，媽媽愛顧店。我一个儂坐客運个，ínn-ínn-á去到十公里外个屏東市看嚨喉科。

去到塊[tè]，掛號了，坐咧等輪到我，哪忍受魚刺鑿喉个痛疼[thàng-thiànn]。回想起來，我按怎赫[hiah]戇直[gōng-ti̍t]，煞袂曉共護士講，拜託醫生先共我處理一下，卜出門个時，媽媽嘛無按呢交帶我。最後著到我，醫生一下手隨將魚刺ngeh--出來，我才脫離痛苦。

轉去學校，一个卡儕歲个同學用國語共我suan講：【魚很好吃hōnn？】。

看著下沿[ē-iân]个，二十幾歲以下个，自細漢著逐工予視大儂迎送[ngiâ-sàng]來迎送去，除了早起去學校、下晡放學[pàng-o̍h]，另外閣再補習囉、學東學西囉、去阿公阿媽兜囉、去叨位仔tshit-thô囉，父母攏著載出載入。想著阮做囡仔，根本毋嘛看過啥儂个父母閣撥工來學校接送囡仔个。我有一站仔跤後tinn náu著，第一、二擺，老父騎oo-tóo-bái載我去到興化廍[hing-á-phōo]，予拳頭師父再福=a thui。閣來，著叫我家治騎跤踏車去，騎歸晡久去，膏藥仔貼好，閣騎歸晡久轉來，按呢咁有彩工塊thui塊貼？我嘛毋知。

即篇並無完成，總是，佇遮停睏。