黨政財軍公教六合一个統治結構使儂憤慨

外來政權个黨、政、財(財團)、軍、公、教，六合一統治集團，怹統治台灣个最高政策，著是剝削多數台灣百姓，利益少數个家治儂。水電、汽油、gá-suh、佮一切民生物資直直起價，將所有个好空[khang]，攏撥過來予怹少數儂享受。

十八pha只是上基本个，其他个優待、福利，講袂了，算袂盡。按呢尚且無夠額，怹按算欲閣制定新法規，予公務人員免上班，穩心仔踮厝裡生產、io囝，薪水照領，講是為著鼓舞生育。閣欲予軍人（教官）全面進入中小學，講是為著解決校園霸凌，顛倒放據在千千萬萬，有受過教育專業訓練个流浪教師，繼續失業。今仔日閣有消息，講欲予公務人員加薪3%。

這著是馬總統執政之下，干那少數儂才有份个英明德政。

請注意，我對公教人員並無敵意。為國家做事，服務民眾，本底著是足光榮个代誌。政府親像一間大公司，予伊个員工好个福利，嘛是應該个。問題是，政府大公司个股東，是全體人民。國民黨咧扞頭[huānn-thâu]个公司刻剝[khik-pak]絕大多數个人民股東，來予相對極少數个員工享受不盡。伊對待人民百姓遮爾不公不義，嚴重離經个大細目，窮實[khîng-si̍t]是咧買收軍公教人員，做柱仔跤，漚步盡展，來維護伊个統治權，這毋但侮辱軍公教个人格，閣卡對不起當佇咧沐沐泅[bo̍k-bo̍k-siû]，強欲駐[tū]--死个人民大眾。