「齧[khè]甘蔗」佮「𤲍[kheh]甘蔗」，唸起來共音，但是意思無仝。本調第三聲个齧，是用喙齒去khè；本調第四聲个𤲍，是用機械去kheh。喙齒好个儂，會用得直接「齧[khè]甘蔗」，但是無牙--个 著愛先「𤲍[kheh]甘蔗」，才承甘蔗汁來啉。一般个果子欲取伊个汁，是用絞[ká]个，但是甘蔗絞無路來，愛用𤲍[kheh]个。街裡車頂，儂若濟，著會相挨相𤲍[sio-e sio-kheh]，兩種意思有相通个所在，攏是「𤲍」。嘛有比喻个講法：儂𤲍甲會出汁[lâng kheh kah ē tshut-tsiap]。
即兩字，佇一般个泉州腔（包括廈門腔）是講做 khuè 佮 khueh, 若是台北縣山區抑是林口个安溪腔是講 kherè 佮 khereh。
íng早𤲍甘蔗，主要是佇草廍、糖廠咧進行，𤲍汁通做糖。日本時代出名个俗語講：第一戇，種甘蔗予會社磅。日本仔糖廠會社剾剝[khau-pak]台灣農民，是四常代，但是為著農業生產个大利益，伊猶原愛予農民活會落去。當今个國民黨，農業利益伊看毋上目[tsiūnn-ba̍k]，著全然無顧農民个死活啦。
佮「齧」[khè]倚近个，閣有「嚙」[gè]。
動詞 gè 通常是指喙齒利利个動物大喙共啥乜貨咬落去。親像「迄隻膨肚狗，看我个跤腿白phau-phau， 煞雄雄共我gè--落去！」毋閣阮嘛用來形容枵sà-sà个儂，食歸箍歸塊个物件，大大下咧咬个形。
Gè 敢哪無方音差。另外，「齧」是教育部(KIP)推薦用字，抑「嚙」無在內，毋閣教育部線上辭典有採用。
教育部推薦用字表內底，將 gè 嘛當做 khè 个又音，我扑算按呢卡無精當[tsing-tòng]。Gè 含有攻擊个動機，khè 卡無。亦凡勢是我細漢兩種腔口攏有接觸著，不知不覺，將伊个意思做分化。
俗語講：甘蔗隨目齧[Kam-tsià suî-ba̍k khè.] 著是做代誌有照坎站、照起工，按部就班[àn-pōo tsiū-pan]。
古早儂講：「sīng伊上踏枋，煞欲上眠床」[sīng i tsiūnn ta̍h-pang, suah beh tsiūnn bîn-tshn̂g.] 得寸進尺(tik-tshùn-tsìn-tshioh)，食儂夠夠，我感覺有時陣咱嘛會用得講：「啊汝食甘蔗，隨目齧őo！」
台灣咧予儂隨目齧，毋知欲按怎？
關係 kheh 个漢字，我是參考教育部台語常用典个寫法，伊將 sioh-kheh / e-kheh / kheh-sio 个 kheh 寫做「𤲍」；我閣參考台日大辭典，伊將 "sio-kheh" 佮「kheh甘蔗」个 kheh，當做是仝一个條目在內个兩種解說，所以漢字應該愛仝款。因為按呢，我才寫做「𤲍」--字，總是即字不止仔罕見歹扑。舊台語文獻，kheh甘蔗往往寫做「硤甘蔗」，即个「硤」卡簡單好認，不過，小可仔無合 sio-kheh 个詞感。
Sio-kheh 个 kheh，文獻也有寫做「揳」，攏比教育部个罕用怪字「𤲍」卡好。
Comments powered by Disqus.