一、官方上早出面來整理台語漢字个主持者著是教羅派个「掌門人」鄭良偉教授。2003年佇伊做國語會主委个時。可見羅馬字佮漢字無影講是水火不容个物件。
二、贊成台語著愛寫漢字个儂，看著台語需要羅馬字个主張，即時緊張kah-，恐驚幾千年个漢字文化會予遐个「妖道」消滅去。顛倒來講，主張台語需要羅馬字个儂，看著官方公佈「推薦漢字」，雖然只是「推薦」爾爾，嘛認為官方是「羅馬字毋好好仔用，欲用漢字」。
三、我知影國語會無夠積極來提出怹對台語書寫个整體政策，在我想，這只是反映國語會台語組內底个委員，到tann並無夠共識，社會嘛無夠共識。
四、但是就怹已經公告个文件來解讀，我認為，無應該認定怹是主張「所公告个 700 个台語詞素攏推薦寫漢字，勿寫羅馬字」。佇公告个「臺灣閩南語漢字選用原則」有寫：
「本表針對臺灣閩南語用字紛歧之語詞，秉持易教易學精神，尊重傳統習用漢字並兼顧音字系統性，推薦適用漢字。」
我甘願卡有量來解說講，怹个意思是，「社會上對某一寡台語常用字詞个漢字寫法真混雜，予學習者、使用者艱苦順趁，所以阮佇遮推薦一套適用个漢字，予想欲寫台語漢字个儂利用」。
五、也著是講，針對一寡台語字詞，想欲寫漢字个儂，通[thang]去參考國語會个推薦漢字；無想欲寫漢字个儂，通去採用國語會个台羅拼音方案。怹盡量將家私頭仔攢[tshuân]予便，欲按怎利用遮个家私，隨儂有伊感覺佮手[kah-tshiú]个用法，但是文字是欲予儂看，佮儂溝通个，所以嘛需要書寫者佮閱讀者來進行不斷个互動佮推撨[tshui-tshiâu]。
所謂「拼音方案」，毋是「注音方案」，若是注音方案，著是漢字个新婦仔，欲做漢字个注音用个，但是官方是講「拼音方案」，拼音文字佔世界語言个多數，當然會使當做獨立文字來用。
六、咱的確愛用包容心來看待台語文字个前途，咱欲做个是千年个事業，任何一套台語書寫个主張，攏閣需要論證、實驗、隨時改進，毋是真理。
註：這是2011年8月29日我發表佇Facebook個人網誌个短文，一直無貼過來即爿。有一位進前佇國語會服務个朋友，今仔日佇面冊看著我即篇，真呵咾。按呢，扑算即篇有淡薄仔價值，所以我貼一份過來遮。當時我个用字，佮目前有小可仔出入，今猶原保留無改。
Comments powered by Disqus.