差不多十一冬前，我才開始綴儂攑手機仔。到昨昏為止，用過三支手機，攏無仝牌子（Nokia / Alcatel / LG），普通貨，基本功能攏有滿意。前兩支攏閣好好，著換新个。即種行為，對我即種儂來講，會有罪惡感。因為我咧用物[mi̍h]，真惜略[sioh-lio̍h]、也真抾拾[khioh-si̍p]。我用物件，攏比別儂擋卡久，別儂个 舊相[kū-siùnn]去，我个 閣新嫣新嫣[sin-ian]。雖然最後總會破爛去，嘛定定毋甘tàn-hìnn-sak。
像我半世儂，嘛才用兩个銀袋仔爾爾。第一个漚[àu]去，無hak-ka̍k，收囥佇櫥仔底。即馬閣咧用第二个，二十外年前我去百貨公司買个。阮老爸閣佇咧个時，捌予我一个，我一直無將第二个thuì掉，提迄个來用，收好好。Tann伊過往也得欲五年矣。
我媽媽有時笑我講，逐家若攏學我即 lō pān，生理儂煞tsua̋n倒了了。
我个第三支手機仔，是三年前門號續約零箍kah个。幾個月前，USB插座對基枋hiauh--起來，袂凍充電、連線，提去屏東神腦服務站，師傅真好意，免費共我黏好勢。無胚 頂兩工閣袂椆啦。即擺台中神腦个師傅無法度矣，講愛送去台北，可能愛開千幾箍。
我就決定閣來辦續約，換新機。按算tshân-tshân欲用優待價來買 HTC Sensation，高級貨。後來勼手[kiu-tshiú]，想講空機兩萬箍个手機仔，太過奢華[tshia-hua]，不如閣用俗手機，省錢換買 iPad 2。
續約用183月租費个方案，我相著一支華為(HuaWei)个機仔，1,791箍；一支 Nokia，2,291箍，加五百。Nokia 迄支，翕像、錄影，閣一寡上網个功能ke卡強。我考慮規晡，時機䆀䆀，決定欲愛卡俗个。
我攏有先上網「做功課」，了解過即兩支機仔个規格。但是櫃台只有 Nokia 个實機，華為个是模型，袂凍真正試用。我想講，經過二十年个發展，手機仔硬體、軟體个技術應該攏足成熟，既然過去我迄三款，攏有我欲愛个基本功能，諒必即馬即款嘛攏有才著。
現金付清買落來，開始使用，才發現大問題，「魔神仔覕佇細節裡」，表面一寡規格袂凍看出決定性个缺點－－伊中文只有注音輸入法，無我佮意用个筆劃輸入法；閣手摺簿[tshiú-tsih-phōo]嘛無密碼保護个功能。另外，欲揣電話簿，每一粒khí，攏愛揤[tshi̍h]幾若下，才會uì注音跳到羅馬字母，我重要个連絡人名稱，攏是用台語拼音，即種設計，根本是咧蹧躂我。
鬱卒點外鐘，才想開－－繼續來用舊機仔叫電話，雖然充電空[khang]害去，袂凍直接踮手機仔充電，著加開淡薄仔錢，另外去買一个座充[tsō-tshiong]，掛一个新電池，優待，總共五百箍。拄好是我無買 Nokia 迄支，省落來个錢！新个即支 HuaWei，著專門提來予筆記型電腦透過 3G 上網用。
我原底著有兩个門號，一个是中華電信个，一个是威寶个；中華電信--个是欲講電話，威寶有行動上網日租型卡俗个方案，用佇出外、抑是轉去屏東欲上網。威寶特別設計一種真薄个細塊SIM卡，佮正常个SIM卡敆[kap]做一塊，插佇一支機仔內。欲上網个時，愛改選威寶个訊號，手機仔重開機，麻煩麻煩。Tann 有兩支3G个手機仔分開用途，著卡方便囉。
我迄陣若決定買加五百箍个Nokia，雖然彼[he]一定有我欲愛个功能，但是著袂想欲閣越頭去利用迄个其實閣會用得个舊機仔。即馬按呢，開平濟錢，但是舊个無扑損去，閣卡方便。
扑算冥冥之中个意志，也是贊同我著愛惜物[sioh-mi̍h]啦。
-----
補充：我煞無注意著「華為」是中國公司，誠害。中國貨，真正袂買得！
Comments powered by Disqus.