2023-09-12學習日記：bah-sînn-á 毋是 bah-sīnn-á

學習台語

bah-sînn-á 才著，教典 bah-sīnn-á 毋著

教典有收一个詞【肉豉仔 bah-sīnn-á】解說是：

[名] 肉豉、豆豉肉。將絞肉和黑豆豉拌炒的菜餚，是臺灣地區常見的家常菜。

伊這有幾若項錯誤：

1. 是 bah-sînn-á 毋是 bah-sīnn-á。即个詞加上尾字「仔」了後，就分袂出來到底是 sīnn 抑是 sînn。但是泉腔儂即个詞無「仔」，干焦講 bah-sînn。所以第五聲 sînn 才合理，台日典標音正確。bah-sînn 个 sînn 台日典漢字寫「䜻」（⿰豆是）； 若是 tāu-sīnn、ìm-sīnn 个 sīnn 伊是寫「豉」。

不而過，單字 sînn 佮 sīnn 台日典煞寫仝字「豉」。這漢字歹剃頭， 佇遮 mài 了傷濟精神……。單字 sînn 伊解說是「果子等等用予碎，sīnn鹽所成个物件」， 例詞有「桃仔sînn」、「青菓sînn」。【青菓 tshing-kó】是橄欖个意思。

1. bah-sînn 佮【豆豉 tāu-sīnn】、【蔭豉 ìm-sīnn】無底代。煮 bah-sînn-á 無一定著濫豆豉。細漢个時，阮兜定定煮 bah-sînn-á，阮阿公佮我攏真愛食， 彼內底根本無豆豉。

2. bah-sînn-á 有時指料理，有時指生个〔絞肉〕。台日典例句：”lia̍h lâi tok bah-sînn” 彼就是生个狀態。

話尾：我高二个時，阿公過往去；我十九歲開始，也毋捌閣食臊矣，到今五十外仔外歲。 所以這食肉个代誌，我較毋捌，請逐家指正賜教。

生活記事

早起阮má-á 講睏袂去，叫我載伊去潮州予鄭漢醫看。去到遐欲掛號， 小姐講醫師無預約个患者就提早下班矣，叫阮下晡才閣來，約四點十分。

伊這無健保，阮提兩禮拜份个藥仔，開兩千八。𪜶个漢藥毋是用科學中藥， 但是派予阮个漢藥也免閣煎，是藥粉仔，按呢逐擺著愛現場製作，不止仔厚工， 等一點鐘久才提著。

轉來萬丹了後，閣提電子鍋去電器行修理，頭家娘講明仔載伊會去買零件。