我佇遮所講个，對網路个老手[láu-tshiú]來講，不過是常識；但是在我家治來講，是加入Facebook tsiânn個月來，一寡仔體驗，想欲卡完整共寫落來。
Facebook表面上幫咱將失散多年个親tsiânn朋友攏揣轉來，咱佇Facebook寫一寡啥乜貨仔，一發表，定定連鞭就看著怹逐家來ni̍h「讚」，抑是進一步共咱回應，佮咱討論。即種即時佮利便，毋是傳統个網誌網站 綴會著个。（雖然傳統个，有RSS即種物，iá是卡輸勢）。
這是因為伊个使用介面佇設計上配合技術个觀念創新，所造成个優勢，予儂親像tshiam moo-hui按呢，無tshiam無代誌，一tshiam著椆咧。
但是Facebook亦有侵害、出賣咱个隱私[ún-su]个大問題，這已經有袂少報導佮提醒。一寡朋友，真愛sńg Facebook个小遊戲个，愛特別細膩。
我發現另外个大條代，是伊个系統其實真封閉，用一重「有入無出」个保護罩[tà]佮廣大个網路世界隔斷--開。
「有入」，是講咱看著啥乜心適个網路資訊，即時會凍利用Facebook連結分享个功能（即種功能會使設做瀏覽器工具列个開關鈕仔，欲連結个時，共點--兩下著好勢），將「外口」个物件提入來Facebook「內底」分享予汝佇即个已經有幾若億用戶个「次世界」个朋友。
抑「無出」咧，是對反个方向，咱佇Facebook內底用心計較所記錄、創作、累積落來，願意佮全世界分享个心血，袂凍自由流通出去予外口个網路大世界存取[tsûn-tshú]。
因為欲看著Facebook个物件，需要個人用儂工主動去遐申請口座。半強迫儂加入个政策，予Facebook公司建立驚死儂大个用戶社群，通吸引廣告來收錢。即種刁意故个限制，致到自動化个tshiau-tshuē-ia̋n-jín，親像Google，或者是收藏網頁个網路機構，親像 www.archive.org 攏走袂入來Facebook共咱个文帖[bûn-thiap]湠湠出去予儂知影。
即一個月來，我佇Facebook了袂少精神所寫个物件，佇Google全然揣袂著，查資料个儂，完全看袂著我个文帖，誠害！雖然我寫个無啥價值，至少捌對一寡無熟似个儂有幫助。家治嘛向望會凍保藏流傳落去。
Facebook即款網站，適合佮一陣隨時增加變動个朋友即時交流互動，但是無適合卡久長个保存、取用，卡普及个播揚、傳承咱个思想佮創作，這iáu是著愛使用傳統个網誌網站。
佳哉，有一个法度會凍兩兼其美[lióng-kiam kî bí]－－文章先寫作、發佈踮一般个Bu-lóo-guh，閣設定自動轉搭个功能，予Facebook遐自動出現連結。像 xuite 遮，著有「同步至Facebook」thang用，即馬蓋濟網誌站攏有即lō功能矣。毋閣，Facebook个朋友，若直接回應蹛Facebook遐，網誌站即爿看袂著。
咱免費利用濟濟網站，用甲爽uainn-uainn ê-sūn-ê-niâ，愛致覺一个現實，建置遮个網站个公司，伊个出發點是欲趁大錢，伊一定會設各種限制，咱一時毋知；怹嘛會利用咱个資料去取利，利用个方法，有个是合法但是汝無的確歡喜个（有啥儂欲加入一个網站，捌斟酌看過伊个使用合約，而且真正了解內底个條款完整个解說佮適用？），閣卡濟是非法个，毋管是無意抑是刁致个。這攏大大超出咱會凍發覺佮控制个範圍。
佇互相利用个當中，掌握愈濟資訊个，愈贏面，抑公司永遠比個人掌握卡濟資訊。雖然咱註定是弱勢，猶原愛做一个卡無遐肉跤个弱勢。
「來喔，來喔，芳貢貢个大塊美國牛排，免錢據在汝食，予汝食甲蹋胸[that-hing]喔。」
美國牛排食落腹，半暝會反症袂？十年後會引起啥乜bái-sian症頭袂？汝咁知？
Comments powered by Disqus.