有寡重要个台語漢字，親像教育部推薦用字內底，表示第三人稱多數个"in"，是建議儂寫做「𪜶」，我个電腦系統扑會出即字，毋知諸君个電腦有顯示無？是徛人爿[khiā-jîn-pîng]，加一个「因」--字。即字一直到 2009 年十月，Unicode 5.2 版才有收。進前一段時間我一直用異用字「怹」來代替。閣卡早，猶未有推薦用字个時，我是寫做女字爿个「姻」。
到甲舊年 2010 年十月，Unicode 6.0 版推出，閣有列入一寡台語口語蓋捷講著，但是毋知欲按怎寫卡好个台語漢字。因為 Unicode 6.0 所收遮个字，字體筆劃袂偌複雜，若寫佇歸句个台語文章內底，意思袂歹臆，雖然教育部猶未收入去推薦用字，總是，現時教育部網路版个台灣閩南語常用詞辭典嘛收幾若字入去矣（伊是用小圖檔來做顯示），所以佮意台語寫漢字个朋友會凍考慮漸漸來採用。
當然，汝个電腦系統無一定有才調處理。我是建議逐家作業系統盡量用卡新閣穩定个，親像 Microsoft Windows 至少著用 Windows 7 以上，瀏覽器用 Firefox，抑是 Google Chrome（Firefox 佇 Windows 7 顯示漢字个效果比 Chrome 卡好，Ie 上蓋差；若 Mac 系統，OS X 10.5、10.6 攏會用得。總是，無論用啥作業系統，字型愛另外去掠日本儂所做，免費予儂下載使用个「花園明朝體」Hanamin 字體，才有包括全部 Unicode 6.0 个漢字。按呢安裝好勢，汝欲看我即篇个台語漢字著卡無問題矣。上後壁我會佮一張圖檔，列出遮个字，方便恁做對照。若是需要輸入个時，愛用迄種有提供「加字、加詞」功能个輸入法，家治將遮个字添入去。親像教育部台語漢字輸入法、信望愛台客語輸入法，嘸蝦米輸入法攏會使。
以下將 Unicode 6.0 新收个 Ho̍h-ló 台語漢字列出來：先列 Unicode 个編號，閣迄个漢字佮音標，才閣拆字素，方便電腦顯示袂出个儂參考，最後寫解說兼例句。另外，伊有收客語漢字，即部份我袂曉得，無列出來，才請客家朋友來介紹。
U+2B74F 𫝏 gàn --（倒爿兩點冰，正爿「彥」）燒燒 雄雄去 ù 著冷个，叫做𫝏。「寒天食冰，喙齒會𫝏。」（請參考我寫个〈耳空輕、目空赤〉，對「𫝏」有詳細解說）
U+2B759 𫝙 tshiò --（頂峘「向」，下跤「上」）正面向頂峘，叫做𫝙。親像「睏坦𫝙」[khùn-thán-tshiò]，著是仰臥[gióng-ngōo]。下神明[hē sîn-bîng] 跋桮[pua̍h-pue]，若平个迄面攏向頂峘，叫做𫝙桮[tshiò-pue]。因為即个「𫝙」佮「笑」台語共音，所以儂攏講「𫝙桮」著是神明咧愛笑，無允桮。教育部辭典無收即字，伊寫做「笑桮」，論真，毋著。
U+2B75B 𫝛 siâng / siāng / sâng --（頂峘「相」，下跤「同」）著是口語「相同」[sio-tâng / sann-tâng]个合音，兩字个「sio-tâng」，台灣愈來愈無儂講，顛倒合音个講法卡時行。若無，著講「相仝[sio-kâng]、相共[sio-kāng]」。
U+2B77A 𫝺 hiù --（倒爿 挑手爿[thio-tshiú-pîng]、正爿「甩」）阮國小畢業旅行，第一擺去台北國父記念館，第一擺入去有𫝺芳水个便所，草地囡仔好玄，緊報別个同學嘛來鼻芳，真好笑。
U+2B77B 𫝻 huê --（倒爿 挑手爿，正爿「回」）「迄个儂真孤獨相[koo-ta̍k-siàng]，伊个物件汝著毋通共伊𫝻--著。」
U+2B7B3 𫞳 kàng --（倒爿「目」，正爿「夅」）目睭展大蕊看儂，叫做「𫞳」，台語「目#𫞳#鬚#tshàng」，著是華語「吹鬍子瞪眼」。台南新化古名「大目降」，是平埔名Tavakangh，漢人聽著，聯想對 Ho̍h-ló 話 tuā-ba̍k-kàng，所以寫做「大目降」，「降」是借音字。「𫞳」是後來創造个台語專用字，康熙字典無。教育部辭典現時嘛無收即字。
U+2B7BC 𫞼 tshāi --（倒爿「立」，正爿「在」）排設个意思，引申做徛佇原地。「物件著𫞼予正。」「毋緊來鬥相共？閣遐𫞼！」
U+2B7CA 𫟊 sio̍h --（倒爿 挑肉爿[thio-jio̍k-pîng]，正爿「席」）皮鞋穿歸工，鞋褪落來，會有臭跤𫟊味。即字教育部建議儂寫做「液」，將「𫟊」當做異用字。
U+2B7E3 𫟣 sōng / sōm --（倒爿足字爿，正爿「喪」）鈍鈍倯倯, 袂扭掠, 叫做「𫟣」。特別是咧講行路个形，親像講「行路𫟣𫟣[sōng-sōng]」、「一箍儂橐𫟣橐𫟣[lok-sōng-lok-sōng]對遐行-來。」、「汝即个囡仔，真愛綴𫟣[tuè-sōng]！」
Comments powered by Disqus.