耳空輕 hīnn-khang-khin，意思像華語『耳根軟』;目孔赤 ba̍k-kháng-tshiah，意思是起怨妬，英語講 green-eyed 或者是 green with envy。台語即兩組三字慣用語，因為已經變做一个詞，毋是主語加述語个結構，所以前兩字攏愛變調，特別注意中央字，「耳空」个「空」第一聲變中調;「目孔」个「孔」第二聲變峘調。
檢采咱會想講：凡勢應該是「目空赤」[ba̍k-khang tshiah]，「目空」个「空」唸本調第一聲，無變調才著，彼毋是對本調第二聲个「孔」變調--來个。我个想法是按呢：若講是「目空赤」，中央字唸本調，是按怎共款結構个「耳空輕」，中央字煞著變調，按呢解說袂統一。雖然目孔[kháng]、目空[khang]，即兩个詞台語攏有，但是有「耳空」，無「耳孔」[hīnn-kháng]，閣卡無「耳khāng」个講法，「耳空輕」个第二字的確有變調。照共款个理路，「目孔赤」上好嘛理解做是「孔」个變調，按呢即兩个構造類似，攏是譬喻用法个慣用詞，著會凍有聲調上一致个分析。我參考台日大辭典，伊个收詞佮記音佮我想个是共樣。
台語用紅色來形容怨妬个目睭，表現出受著情緒影響，牽紅筋个目睭，真合理。抑英語煞用青(green)來形容，毋是因為阿啄仔有青色个目睭仁，彼是Shakespeare戲劇个故典。古早希臘儂相信嫉妬心會引起膽汁分泌過多，致到面色青sún-sún。即套觀念傳到Shakespeare，伊創造出green-eyed monster「青目个怪物」來比喻儂个怨妬心。
扑鐵个時，用炎火共鐵炰[pu5]予紅閣軟，才用鐵搥摃，摃了欲予鐵變鋼[kǹg]，愛ù冷水（抑是油），tshi...一聲，閣會tshìng煙。燒燙燙个鐵gàn水即號動作，著叫做gàn鐵、gàn鋼。燒燒个物件雄雄去ù冷个，叫做gàn。"Ù"會使ù燒加溫、ù冷降溫，"gàn"攏是ù冷--个降溫。"Gàn"做動詞，嘛通做形容詞。寒--儂真冷，透早對厝內出來口面，燒燒个皮膚接觸著冷空氣，會gàn。食冰，喙齒真gàn。Gàn 是卡精密个形容，毋是單純个「寒 kuânn」抑是「冷」。Gàn 个漢字，教育部辭典寫做倒手爿「兩點水 nn̄g-tiám-suí」（就是「冰」个字部），正爿一个「彥」--字：「𫝏」，一般電腦顯示袂出來。
拜拜燒金銀紙，燒了，有一个儀式，提拜過个冷酒，倒落去佇燒火灰个四箍碾轉，踅一碾圓圓，叫做gàn錢。哪gàn-tsînn，哪唸好話：「Gàn一个圓，大趁錢」[Gàn tsi̍t ê înn, tuā thàn-tsînn]，按呢祭拜个儀式才算圓滿。眾儂it著欲大趁錢，自然著會記得愛gàn-tsînn。古早儂設即號風例，正實个動機，在佇我想，是驚見[kiann-kìnn / kiann-ánn]引起火災。尤其是培墓个時，íng-íng無爐仔通用，直接蹛塗跤燒銀紙，略仔heh著會火燒埔。想出即句話教儂唸个先賢，通予咱感念。總是，金銀紙iah是卡莫燒咧卡環保。
頂面解說"gàn"个意思了，即馬閣轉來講目睭。目孔赤，微血管[bî-hueh-kńg]充血[tshiong-hiat]个時，目睭著會燒熱[sio-jia̍t]，燒熱著愛降溫，儂才會卡爽快。即陣欲降溫，gàn冷水無效，因為目孔赤个原因，窮真[khîng-tsin]是心理因素，毋是身體koh樣。儂有，汝無，毋甘願，目睭起lô，目孔赤，想欲共儂討，著講「汝嘛淡薄仔予我gàn目咧」，gàn-ba̍k佇遮是引申个用法，基本个意思著是英語"share"啦。怨無，無怨少，加減一寡來分我，我著袂目孔赤矣。Gàn-ba̍k嘛通講giàn-ba̍k，即个giàn是「過癮」[kuè-giàn]个giàn，滿足習慣性个貪欲。
Comments powered by Disqus.