Windows 7 顯示 Unicode 台語漢字

Windows 7 使用者上網瀏覽台語資料个時，若欲完整顯示 Unicode 有收个台語字，著愛用 Firefox 瀏覽器，配合「花園明朝體」字型。

若是安裝設定了有成功，應該就看會著我佇遮所扑个「𪜶」(人+因 in)、「𬦰」(足+百 peh)、「𫔘」(門+丨 tú)、「𨑨迌」(辵+日、辵+月 tshit-thô)、「𠢕」(敖+力 gâu)。總共有六字。

若是用 Window 8、甚至 Windows 10，若是無裝花園明朝體，恐驚猶原看袂著以上完整个六字。

花園明朝體是日本儂制作个字型，伊个漢字寫法，佮台灣教育部小可仔出入，親像「𨑨迌 tshit-thô」个「走馬仔」（就是「辵部」），台灣是寫一點，閣一个親像 3 个形體，了後才閣一个拖刀[thua-to]（台語「拖刀」就是指〔長捺〕），但是花園明朝體是寫兩點，抑迄个「3」个所在彎一斡，無彎兩斡。不過，「𨑨迌 tshit-thô」有較濟其他个字型檔有收，所以恁新版个作業系統，扑算免閣安裝額外个字型，就看會著即兩字囉。

有儂是用「台灣楷體」佮「台灣宋體」字型，可惜伊內底个台語字，有一部份雖然 Unicode 已經正式收入，但是伊猶原使用非標準个方式，佔用別字个空間來造迄幾字。這毋是理想个做法。

花園明朝體 2016 年版下載

下載壓縮檔了後，解壓縮，有兩个 ttf 檔案：HanaMinA.ttf、HanaMinB.ttf。按右鍵，選安裝。