有講：既然咱所聽著个「交通安全#」台語是前三字有變調，尾字才本調，按呢仝款結構（兩字名詞 + 兩字名詞）个複合四字名詞「煙火安全」是毋是嘛一定愛比照仝款方式落去唸「煙火安全#」，前三字攏著變調，才有一致？
論真，台語變調个問題，所牽涉--著个因素不止複雜，毋是干焦考慮語法結構爾爾，閣有文白生熟、韻律節奏个影響，所以準做是仝款結構个四字詞，也毋是一律著按怎變才著。伊个變調現象變化多端，毋是唯一答案，但是猶原攏有道理佇咧。
「文白生熟」牽涉著：較文言、書面个、較生疏个語詞，變調組會切較幼，予較濟字唸本調、而且唸較慢（這也佮節奏有關），按呢較好理解。相對來講，若是白話、熟語，就較愛唸變調。
親像書面語「心#滿#意#足#」、「心#煩#意#亂#」、「心#堅#意#切#」、「心#甘#情#願#」，四字攏本調。但是仝款結構，「主語+謂語、主語+謂語」个白話四字熟語「心狂火𤏸# sim-kông-hué-to̍h#」前三字攏變調較捷講，「心狂#火𤏸#」嘛iáu會使，若是分開唸「心#狂#火#𤏸#」就傷勉強，袂自然矣。
其他「主謂並列結構」口語成語个例，親像「頭燒(#)耳熱# thâu-sio-hīnn-jua̍h#」、「跤酸(#)手軟# kha-sng-tshiú-nńg#」、「頭眩目暗# thâu-hîn-ba̍k-àm#」、「父老(#)囝幼# pē-lāu-kiánn-iù#」。遮个詞，前三字攏變調，扑算是上捷聽著，上自然个，總--是，唸較慢个時，中央切開，分做兩个聲調組，也會得過，這佮音步結構有關，參考下面个說明。
「韻律節奏」牽涉著音步結構（兩字 一个「音步」、三字 一个「超音步」）佮節奏速度對慢到緊个各種問題，慢个較好理解，緊个較省時間。
複合名詞「交通安全」是咱現代儂捷用个熟語，前三字變調真自然。但是生活中較罕得講著个四字詞像「煙火安全」，免的確一開始就前三字攏唸變調，「煙火」是一个音步，「安全」是一个音步，先照音步結構，分兩个聲調組唸做「煙火#安全#」顛倒較符合老輩儂拄看著即个書面語詞自然讀出來个反應，到甲年久月深變成常用詞，就漸漸較慣勢變調來唸，像「交通安全#」按呢，唸做「煙火安全#」。
這無論是布袋戲口白，抑是鄉親父老佇日常生活中講起，攏有即種現象。這是一个方向，毋是絕對个。
閣可比是佇一場演講內底，一開始先講「煙火#安全#」，後壁再三提起，漸漸變講「煙火安全#」我認為也真合理。這毋是「前後無一致」个錯誤，是一種由生到熟，真自然个聲調變化、運用。
總--是，若一開始就欲講「煙火安全#」也是可以，不而過，咱毋通認定這是唯一正確个聲調講法就是。
若是四句聯，因為七字詩句韻律節奏个需要，也較愛拆開來唸，即種節奏个枝骨是按呢：
「〇〇#1 〇〇#2 〇〇〇#3」，#3 是上長个斷音點，閣來是 #2，上短个是 #1。
今，我凊彩來做--一葩做例：
煙火#安全#愛注意#（ian-hué# an-tsuân# ài tsù-ì#）
暝昏#早暗#著張持#（mê-hng# tsá-àm# tio̍h tiunn-tî#）
消防#設備#滅火器#（siau-hông# siat-pī# bia̍t-hué-khì#）
檢查#換新#照定時#（kiám-tsa# uānn-sin# tsiàu tīng-sî#）
即種斷音法是台語七字句、四句聯蓋第一四常个，但是請注意，我毋是講「〇〇#1 〇〇#2 〇〇〇#3」即種韻律節奏就是決定變調行為唯一个斷音法，這仝款愛綜合考慮各種因素，尤其是句法結構。咱聽呂柳仙勸世歌第一葩是按呢變調：
即款#个歌#真希罕# 專講#勸#--儂 在世間# 儂#有真𠢕#真頇顢# 俗語#所講#為人#難#
第一句本變調有合 2/2/3 節奏性个斷音點。第二句若照一般个口語話句，迄个「講」是較愛變調，但是伊無變，這就是受韻律个影響。第三句「儂」是單字主語，斷音點先出現佇「儂」遐，，予「有」照句法結構連落去唸較自然。第四句尾三字「為人#難#」是一種主謂結構，伊選擇佇主語「為人」尾字唸本調，予儂聽較明，無將三字合做一个聲調組。
（補充：伊這雖然是用唱个，但是旋律佮講話个聲調非常搭峇，干焦第二句後壁「世間」个「世」聽起來像講話个中平調，但是因為「世間」个「世」一定是變調，伊佇後壁也有閣唸著，所以無影響佇遮个討論。第四句个「講」也較成中平調，毋是高降調，這佮「世間」个「世」本來愛講高降調是類似情形，就是拄著講話个實調是高降調个所在－－可能是變調，也可能是本調个位置－－唸歌个旋律有時會調整做較平个調較好唱。）
咱閣參考「無米樂」記錄片。
10:15 煌明伯：「農業#文化#」
32:00 以後，崑濱伯：「國民政府#」「二二八事件#」
51:20 ~ 52:15 崑濱伯、崑濱姆：「末代#稻農# bua̍t-tāi# tiū-lông#」
54:35 以後，崑濱伯：「玉皇大帝#」「三官#大帝# [Sam-kuan# Tāi-tè#]」、「國#泰#民安#、風#調#雨#順# [kok# thài# bîn an# hong# tiau# ú# sūn#]」、「天上#聖母# [Thian-siōng# Sìng-bó#]」「岳府#元帥#」、「玄天#上帝#」、「福德#正神#」
以上若照一寡「台語專家」个變調理論：「四字複合名詞，前三字攏愛變調」，咁毋是真濟矛盾無一致，閣一大堆錯誤？但是若照我長期觀察各種實際語料，綜合語法結構、韻律節奏、生熟文白各種角度來分析，按呢攏是合理个台語變調。
頂面个語料，除了複合名詞，也有主謂式四字成語，像「國泰民安」，我所知至少有三種讀法，我認為攏會使接受，毋是只有一種標準答案：
1.「國#泰#民#安#」：「主語+謂詞；主語+謂語」个並列結構，每一字攏是單獨成做一个小詞組，單獨唸本調。
2.「國泰#民安#」：音步化，兩字一音步，形成一个變調組，「國泰」一組、「民安」一組。
3.「國#泰#民安#」：這看起來前後矛盾，但是真四常，毋但崑濱伯一儂按呢唸爾爾。分析起來前兩字是當做「主謂式結構」；後兩字是當做一个音步連讀變調，小可仔較緊，「民安#」比較若唸「民#安#」，「民」字本調低升調，就愛拖較長去。即種由慢到緊个節奏，先較慢予儂好理解，閣來較緊，予講个佮聽个儂攏省時省力，是真有效个溝通策略。閣一个例，「龍飛鳳舞」，我嘛認為唸做「liông# hui# hōng bú#」上自然。
歸納台語變調規則，毋通干焦會曉採用語法結構分析个一種角度，捎著有限个語料，就做無限个類推，一支竹篙押倒一船儎[tsûn-tsāi]，結果越頭去否定咱个父老鄉親所講个台語，煞變做無數个鄉親攏毋著，干焦台語評審一个儂个變調法才著，這毋是播揚台語个正道。咱若多方面收集各種台語語料來分析，就會發現代誌毋是台語評審所想个遐爾簡單。
當今个「台語界」，至少有兩篷勢力，一篷是像一寡新聞氣象主播，毋知影本調、變調是啥，干焦靠直覺講台語，但是因為怹上慣勢个語言是華語，毋是台語，所以怹个台語直覺，問題真大。怹所講个台語，真濟該變調無變調，可比「南部地區」、「屏東地區」，早就應該是熟甲爛去个四字詞，但是怹猶原一直講「南部#地區#」、「屏東#地區#」，無講較自然个「南部地區#」、「屏東地區#」。
閣一篷勢力是像一寡台語評審，堅持四字複合詞前三字一律愛變調，所以認定「資源回收」袂使講「資源#回收#」，干焦會使講「資源回收#」，甚至連躼躼長个「聚合式複合名詞」（機關、團體、道路、封號个名稱等等），伊也主張頭前每一字攏愛變調，煞規定儂「台中生活四號快速道路」前九字攏愛變調，hàm-kuā-kuā！
就我客觀分析先賢、父老个語料了後來看，即兩篷勢力攏有偏去。
Comments powered by Disqus.