tshiō光暗碼

有一phō冊，有kah一片光盤[kng-puânn]。冊有冊个利便佮不便；光盤軟體亦有伊个利便佮不便。我冊khng3佇khiā个厝，佇學校研究室卜查，著愛用軟體，毋閣軟體介面顯示个資料無完整，愛閣另外掀冊。

我知影若是直接扑開伊个資料庫檔案，就看會著ka-nn̂g个內容，毋閣彼有暗碼佇--塊。伊物件是買我喇，毋閣其中有一个kuà，tauh一粒鎖，按呢我是物件个所有者，到底會使將迄粒鎖khà--開袂？

若是「類比時代」个物，美國賣方大常會貼條仔佇鎖頭頂警告講：消費者若共摃--開，按呢後日物仔歹去，阮攏無擔責成[tann tsik-sîng]。若是數位時代，美國賣方定定會kah一張EULA(End User License Agreement)，對買方使用伊軟體个方式種種限制。若台灣个賣方，比較的[tik]，無品明甲hiah到角[kàu-kak]。

無論法律有准無准，我一直攏歹勢按呢做。今仔日，一時心狂，想空[khang]去網路邊 khioh一支手電仔，將彼暗碼tshiō予光。

資訊時代，「慎獨[sīn-to̍k]」个工夫愈oh。