即篇整理一寡有用著詞素「彩 tshái」--字个台語詞，想欲一理[it-lí]貫通來分析，揫[tshiû]出怹背後个中心意義，就是指「獎品」佮「機運」。
相關个台語詞，我大概仔分做四種詞性，先共伊列出來。
一、名詞：彩頭（好彩頭）、頭彩（好頭彩）。
二、形容詞：無彩（「無彩」會使做及物動詞，後壁紲接名詞受詞，親像「無彩工、無彩錢、無彩水、無彩儂物[mi̍h]）、凊彩。
三、副詞：檢彩（敢彩）[kiám/kám-tshái]、拄彩[tú-tshái]。
四、動詞：作彩[tsok-tshái]、解彩[kái-tshái]。
即堆台語詞个「彩」，我認為伊背後个中心意義，就是「具體的[tik]是競賽、跋筊个獎品；抽象引申指機運」。愛掌握著即个共通點，才會凍有效率來pang-tsān學習者，予怹認捌佮活用每一个個別个語詞按怎「向外伸展[tshun-tián]」去成立伊个意義佮用法。毋通干焦紛紛散散，孤个語詞去開拆[khui-thiah]，列出濟濟予儂看袂出其中有啥相干个義項，煞來茹亂[jû-luān]咱个腦智。
先講「彩」佇古漢文个本義，《說文解字》講：「文章也，从（從）彡[sâm/sam]，采聲」。「文章」毋是寫作、做文迄種文章，是指文彩、花樣迄類个意思。請看即个「彡」，就是畫出三條彩帶，嘛會使講是鬚鬚[tshiu-tshiu]个裝飾品。「彡」是「形符」，畫出伊个意義；「采」是「聲符」，表示發音，所以「彩」就是造字法度「六書」內底个「形聲字」。「采、彩、採、綵」是同源字，後世用法分化，寫法嘛分。
後來，因為競賽遊戲、相輸跋筊贏著个獎品、財物，定定攏包裝、tsng-thānn甲五花十色[gōo-hue tsa̍p-sik]，好看、顯目[hiánn-ba̍k]，予中獎个儂提咧四界影揚[iánn-iông]，真囂俳[hiau-pai]；抑[iah]無中獎个儂，目睭金金、干焦giàn，所以就用「彩」來表示「獎品」。親像李太白〈送外甥鄭灌從軍〉个詩句「六博爭雄好彩來，金盤一擲萬人開」。閣來，欲比贏、欲中獎，愛有機緣、靠運氣，所以「彩」抽象个引申義就是「機運」。
「彩」有「獎品」佮「機運」个意思，這佇中文字典查會著，古早就有咧用 。閣像近代个「彩券 tshái-kuàn/kǹg」个「彩」也是指靠機運得著个獎品、獎金。若台語在來詞「彩頭」本意是指會凍中獎个起端、兆頭[tiāu-thâu]，「好彩頭」就是好兆頭、好機運。台語嘛有講「頭彩」，這會使得用做「彩頭」个意思，「好彩頭」嘛會使講「好頭彩」，不過「頭彩」有另外一个意思是「頭等个大獎」，指獎項本身。
台語閣有其他有用著「彩」个在來詞，也包含「獎品、機運」个意思，毋過逐家攏干焦會曉綴儂講，煞袂曉開拆，毋知影是按怎台語儂个祖先欲按呢講。親像「無彩」个原始意義，就是無獎品、失機運，所以就引申做「真可惜、phah-sńg、足毋甘」个心理形容詞來應用。「無彩工」就是真可惜，白了工。「無彩錢」就是真可惜，白了錢。「有彩工」就是用工有目的，無白費，「有彩工」通常用佇疑問句。
閣來，台語「凊彩 tshìn-tshái」實在毋是過去一寡前輩所認定个「請裁」即兩字。「汝欲食啥乜？」「凊彩。」按呢應[ìn]，並毋是講「請汝裁決」，都[to]毋是非常正式閣嚴重个場合，才有需要一个權威者來裁決。閣再講，咁講「請裁 tshíng-tshâi」煞逐所在攏縒音變做 tshìn-tshái，這嘛傷譀矣，毋是嚴謹个音韻學家做會出个考證。所以 tshìn-tshái 寫做「請裁」，音、義攏袂通。台語「凊彩」个「彩」根本是指「機會、機運」，也就是「隨機任運」，啥乜攏好，就準講毋是偌熱烈、偌tshia-iānn个機運、都合、物件，攏無差，所以才講「凊彩」，「凊」是指予儂袂爽快个冷冷个感覺。
不過，我個人對 tshìn-tshái 个第一音節，究真咁正實是「凊」--字，猶原有保留。在我想，凡勢是「趁」--字个特殊發音。「趁」讀冊音是 thìn，白話音是 thàn，佇遮可能另外有一个特殊音 tshìn。「趁」是「綴[tuè]、隨順、按照」个意思。按呢「趁彩 tshìn-tshái」就解說做「隨順機運、按怎攏好」个意思，即種說法[sueh-huat]，我自認閣愈完美。毋過，恐驚毋捌有儂按呢提過，所以著愛聽候[thìng-hāu]後日閣再詳細稽考。
「檢彩 kiám-tshái」个第一音節，到底是啥意思？即个詞，有真濟腔口變體，台日大辭典至少有收四種：kám-tshái、kiám-tshái、khiám-tshái、tshám-tshái（檢彩 "kiám-tshái" 是目前上捷聽著个）。我扑算上原始个音是 kám-tshái，按呢第一音節本字就是「敢 kám」，表示無確定、有疑問。親像疑問句「Kám是按呢？」嘛有儂講「Kiám是按呢？」。總是，即个詞絕對佮「機運」有關係，所以第二字寫「彩」無問題，「敢彩 kám-tshái」兩詞素合起來，表示對「機運」按怎，有所「疑問」，就是華語「也許、或許、興許、說不定」个意思，tshiàng-suh-tshiàng-suh，無定會按怎。例句：「這我毋捌，敢彩有友志知影，請共阮指教」。請注意，規句咧講个時，「彩」愛變調做第一聲。
「拄彩(仔) tú-tshái(-á)」這佮「敢彩」意思差不多，毋知各位有聽過無？先父定定咧講，若講緊會變做 tú-sái-á。這是句頭副詞，原始意義是「拄著某種機運」，引申做「萬不一」按怎个意思。例句：「熱--儂 出門愛會記得紮雨幔[hōo-mua]，拄彩仔下晡若變天，siàng西北雨，才袂沃甲一身ná水鼠。」（「拄彩仔」三字攏愛變第一聲）
「作彩」是進行某種儀式、行為，來改善運命、機運，抑是咒詛[tsiù-tsóo]儂，予儂歹運。「解彩」意思差不多，是解運，抑是共儂創空、扑觸衰[phah-tshik-sue]。
對以上个分析，咱看會出，台語有用著「彩」个語詞，有袂少是偏向咧指「機運」即種進一步引申个抽象意義。對「文彩」引申到「獎品」，閣引申到「機運」。歷來个台語漢字研究者，絪絪豆藤[in-in tāu-tîn]，掌握袂著內中个奧義[ò-gī]，真無彩。各位若看教育部个用字解析（下跤有連結），比較就知。
其他有用著「彩」--字个台語詞閣真濟，親像「光彩、神彩、清彩、紅彩（綵）、八仙彩（綵）」等等，因為中心意義佮本文主題koh樣，佇遮無討論。
教育部推薦用字：
「無彩 bô-tshái、無彩工 bô-tshái-kang」（官方用字解析）http://140.111.56.95/hanji/annesia/pdf/annesia292pdf.pdf
「凊彩 tshìn-tshái」（官方用字解析）http://140.111.56.95/hanji/annesia/pdf/annesia304pdf.pdf
Comments powered by Disqus.